BAAning Dubay shahrida joylashgan Gulf medical university bitiruvchilari va shifokorlari Farg‘ona jamoat salomatligi tibbiyot institutida Doctor of medicine mutaxassisligi bo‘yicha xalqaro darajadagi magistraturada o‘qiydi. Bu haqda institut matbuot xizmati xabar berdi.
Ma’lum qilinishicha, Farg‘ona jamoat salomatligi tibbiyot instituti va Gulf tibbiyot universiteti (Gulf medical university) bilan hamkorlikda Doctor of medicine (еterapiya) mutaxassisligi bo‘yicha 4 yillik magistratura qo‘shma ta’lim dasturi tashkil etildi.
Ikki oliygoh rektorlari tomonidan imzolangan hamkorlik shartnomasiga ko‘ra, o‘quv jarayoniga xalqaro ta’lim standartlarga asoslangan ilg‘or pedagogik texnologiyalar, o‘quv dasturlari va o‘quv-uslubiy materiallari keng joriy qilinadi, professor-o‘qituvchilar va talabalar o‘rtasida mahorat darslari o‘tkazilib, malaka oshirish kurslariga universitetdan yuqori malakali o‘qituvchilar va olimlar faol jalb qilinadi.
Sog‘liqni saqlash vazirligi, Oliy ta’lim, fan va innovatsiyalar vazirligi tomonidan kelishilgan holda tasdiqlangan qabul kvotasida Doctor of medicine mutaxassisligi bo‘yicha Farg‘ona jamoat salomatligi tibbiyot institutida 2024/2025-o‘quv yilidan 100 nafar bakalavr darajasiga ega xorijiy fuqarolarni magistratura ta’lim dasturida o‘qitish rejalashtirilgan.
Magistrlar 1-2-bosqichda Problem based learning, 3-4-bosqichda esa Workplace-Based Learning ta’lim texnologiyalari asosida o‘qitiladi.
“Ahamiyatlisi shundaki, ta’lim dasturi Buyuk Britaniyaning The Quality Assurance Agency for Higher Education tashkiloti tomonidan xalqaro akkreditatsiyadan o‘tkaziladi va bitiruvchilar butun dunyoda tan olinadigan xalqaro diplomga ega bo‘ladi”, — deyiladi xabarda.
Ta’kidlanishicha, tibbiyotning Doctor of medicine yo‘nalishida magistratura qo‘shma ta’lim dasturi asosida o‘qitish O‘zbekistonda birinchi marta Farg‘ona jamoat salomatligi tibbiyot institutida yo‘lga qo‘yilmoqda.
Izoh (0)