O‘zbekistonda “Mening bog‘im” loyihasi g‘oliblari e’lon qilindi

O‘zbekistonda jamoatchilik fikri asosida ishlab chiqilgan “Mening bog‘im” loyihasi g‘oliblari e’lon qilindi.

2024-yil 23-iyundan 7-iyulga qadar davom etgan jarayonda O‘zbekiston bo‘ylab “Ochiq byudjet” portali orqali 53 mingtadan ortiq ovoz berildi. Iqtisodiyot va moliya vazirligi matbuot xizmatining xabar qilishicha, ovoz berish jarayoni yakunlariga ko‘ra, 215 ta loyiha g‘olib deb topildi.

G‘olib bo‘lgan loyihalarni moliyalashtirish uchun respublika bo‘yicha 48,6 milliard so‘m mablag‘ yo‘naltiriladi. G‘olib deb topilgan loyihalar bilan quyidagi havola orqali tanishish mumkin.

Prezidentning 2023-yil 23-noyabrdagi farmonida byudjetdan har yili ajratiladigan mablag‘larning kamida 50 foizi “yashil bog‘lar” va “yashil jamoat parklari”ni tashkil qilish uchun “Ochiq budjet” axborot portali orqali jamoatchilik fikri asosida shakllangan “Mening bog‘im” loyihalarini moliyalashtirishga yo‘naltirilishi belgilangandi.

Mart oyida Shavkat Mirziyoyev videoselektor yig‘ilishida Ekologiya vazirligiga “Mening bog‘im” loyihasini ishga tushirishni topshirgandi.

“Mening bog‘im” loyihalarini shakllantirish va moliyalashtirish tartibi to‘g‘risidagi nizomga ko‘ra, Ekologiya vazirligi “Yashil makon” umummilliy loyihasi uchun byudjetdan ajratilgan mablag‘larning kamida 50 foizini “Mening bog‘im” loyihalari doirasida “yashil bog‘” va “yashil jamoat parklari”ni tashkil etishni moliyalashtirish uchun tumanlarga (shaharlarga) teng taqsimlagan holda vazirlik hududiy bo‘linmalarining maxsus shaxsiy g‘azna hisobvaraqlariga o‘tkazadi.