Qozog‘istonning Atirau viloyatida zaharli qoraqurt o‘rgimchaklari oqibatida chorva mollari nobud bo‘lmoqda, odamlar shifoxonaga yotqizilmoqda. Bu haqda Tengrinews xabar berdi.
Ma’lum qilinishicha, qumloq joylarda zaharli hasharotlar sonining ko‘payishi kuzatilmoqda, hozirgacha 63 bosh tuya nobud bo‘lgan.
“Zaharli o‘rgimchaklar chaqishi ortidan 397 bosh tuya zarar ko‘rgan, ulardan 217 boshi davolangan. Nobud bo‘lgan va jabrlangan hayvonlardan testlar olinib, veterinariya ko‘rigiga yuborilgan”, — dedi Atirau viloyati qishloq xo‘jaligi va yer munosabatlari boshqarmasi matbuot kotibi Aktilek Nurollayeva.
U kasallangan va o‘lgan jonivorlar uchun kompensatsiya to‘lanmasligini aytdi.
“Mahalliy veterinariya shifokorlari davolash uchun barcha choralarni ko‘rmoqda”, — deya qo‘shimcha qildi u.
Mutaxassislar mahalliy chorvadorlardan zaharli hasharotlar bo‘lishi mumkin bo‘lgan yaylovlarga tuya, ot va sigirlarni olib chiqmaslikni, hayvonlarda kasallik belgilari aniqlansa, darhol xabar berishni so‘ragan. O‘z navbatida, otlarning o‘limi qayd etilgan.
Xavfli hasharotlar hozir Indera viloyatining O‘rliq, Ko‘kto‘g‘ay, Esbol va Eltay qishloqlarini bosib olgan. Qishloq aholisi ham zaharli o‘rgimchak chaqishidan aziyat chekmoqda. Bu haqda Inderskiy tumani hokimligi rasmiy vakili Ali Jayshiliq ma’lum qilgan.
“Birinchi holat 29-may kuni qayd etilgan. Jami to‘qqiz kishi, jumladan, yetti nafar yoshi kattalar, 7 va 15 yoshli ikki maktab o‘quvchisi jabrlangan. Ayni paytda qishloq aholisining sakkiz nafari statsionar, bir nafari ambulator davolanishda, bir nafari esa tibbiy yordamdan bosh tortgan. Kasalxonalarda zaharli hasharotlar chaqishini davolash uchun ko‘plab dori-darmonlar mavjud”, — deydi Ali Jayshiliq.
Izoh (0)