Avstraliyada 4-iyul kuni Falastinni qo‘llab namoyishga chiqqan fuqarolar parlament binosiga kirishga muvaffaq bo‘lgan. Bu haqda Reuters manbasi xabar berdi.
Holat to‘g‘ridan to‘g‘ri mamlakat poytaxti Kanberrada ro‘y bergan. Ko‘p sonli namoyishchilar ruxsatsiz parlament binosi oldida to‘plangan va bino ichiga kirib olgan.
Parlament binosi tomiga chiqqan namoyishchilar “Ozod Falastin” deb yozilgan bannerlarni shahar aholisiga ko‘rinarli tarzda ilib qo‘ygan. Bu harakat bilan hukumatni Isroil bilan aloqalarini uzishga chaqirishgan.
Avstraliya parlamenti rasmiylari yuz bergan hodisani xavfsizlik tartibining qo‘pol tarzda buzilishi deb baholagan. Namoyishchilarning parlamentgacha yetib kelishi jiddiy signal sifatida qabul qilingan.
Hukumat vakillari noqonuniy namoyishlarni to‘xtatishni talab qilgan. Har qanday jiddiy sabab parlament hududiga bostirib kirishni oqlay olmasligi aytilgan.
“Biz unutmaymiz, kechirmaymiz va qarshilik ko‘rsatishda davom etamiz”, — deya hukumat eʼtirozlariga javob bergan namoyishchilar.
Kanberra politsiyasi namoyishchilarni tarqatish uchun parlament hududiga brigadalar yuborgan. Namoyishchilarning bir qismi politsiyaga qarshilik qilgani uchun hibsga olingan. Aholiga o‘q uzish holatlari ro‘y bermagan.
Ayni paytda boshqa bir namoyishchilar guruhi Kanberra ko‘chalari bo‘ylab “Daryodan dengizgacha”, “Falastinga ozodlik ber” kabi eʼlonlarni o‘rnatishda davom etgan. Hukumat parlamentdagi voqealardan kelib chiqib, davlat muassasalarida qo‘riqlash choralarini kuchaytirgan.
Izoh (0)