Pokiston terrorizmga qarshi kurashishga qaratilgan yangi harbiy operatsiya doirasida Afg‘oniston hududiga to‘g‘ridan-to‘g‘ri hujumlarni davom ettiradi. Bu haqda Pokiston mudofaa vaziri Xavafa Osif bergan bayonotga asoslanib, BBC nashri xabar berdi.
Pokiston mudofaa vaziriga ko‘ra, Islomobodning Afg‘onistonga havo zarbalari Pokiston xavfsizlik kuchlari va tinch aholini nishonga olishda ayblagan guruhlarga qaratilgan. Harbiylar qo‘shni mamlakatdagi tinch aholi vakillariga bitta ham o‘q uzmagan hamda hukumat tomonidan maksimal keskinlikdan tiyilishga chaqirilgan.
Pokiston rasmiylari Afg‘oniston janubi-sharqidagi “Tahriki Tolibon” va boshqa guruhlarni teraktlar tashkil etishda ayblagan. O‘z mamlakati chegaralari xavfsizligini taʼminlash uchun Afg‘oniston chegarabo‘yi hududlariga hujumlar tashkil etgan.
“Afg‘onistonda amaliyotlar o‘tkazganimiz to‘g‘ri va buni davom ettiramiz. Biz ularni tort va pishiriqlar bilan siylamaymiz. Hujum qilindimi, biz ham javob qaytaramiz”, — degan Pokiston mudofaa vaziri BBC Urdu nashriga bergan intervyusida.
Pokiston rasmiysi ,shuningdek, qo‘shni davlatga zarbalar qonuniyligiga hech qanday shubha bo‘lishi mumkin emasligini taʼkidlagan. Pokiston o‘z harbiy hujum rejalari haqidagi hech kimga, hatto Afg‘onistonga ham ogohlantirish berishga majbur emasligi aytilgan.
“Bu narsa hujum muvaffaqiyatini yo‘qqa chiqaradi. Axir nega biz ularga ʼtayyor bo‘linglar, biz kelyapmiz' deb ogohlantirish berishimiz kerak?”, — degan Xavafa Osif.
“Tolibon” Pokiston vazirining so‘nggi bayonotini “masʼuliyatsizlik” deb taʼkidlab, Pokistonni transchegaraviy hujumlarning xavfli oqibatlaridan ogohlantirgan. Islomobod esa “Tolibon” o‘z mamlakati ichidagi terrorizmga qarshi kurasha olmayotgani bois, Islomobod ishlariga aralashishga haqli emasligini bildirgan.
Izoh (0)