Amazon to‘g‘ridan to‘g‘ri OpenAI ChatGPT bilan raqobatlashadigan chatbot ustida ishlamoqda. Metis nomini olgan loyiha ichki sinovdan o‘tkazilmoqda. Chatbot Amazon’ning Olympus modeliga asoslangan bo‘lib, ommaga ochiq bo‘lgan Titan modelining yanada kuchli versiyasidir.
Business Insider ma’lumotlariga ko‘ra, Metis bazaviy darajada tasvirlar va matnlarni yaratish, o‘z ma’lumotlar manbalariga havolalarni almashish, qo‘shimcha so‘rovlarni taklif qilish va hokazolarni amalga oshirishi mumkin. Metis internetda tegishli ma’lumotlarni qidirishi va AI agenti sifatida ishlay oladi (masalan, unga ta’tilda dam olish yo‘nalishini tuzish vakolati berilishi mumkin).
Nashr manbalariga ko‘ra, Amazon Metis’ni yaratish uchun Alexa resurslaridan foydalanmoqda, bundan tashqari, chatbotlarni ishlab chiqish guruhi qisman Alexa jamoasidan tuzilgan. Chatbotning ishga tushirilishi sentyabr oyida rejalashtirilgan, biroq vaqt o‘zgarishi mumkin.
Amazon o‘z raqobatchilari shug‘ullanayotgan AI poygasiga yetib olishga harakat qilmoqda. Amazon Titan’ning sun’iy intellekt modeli boshqa kompaniyalar mahsulotlariga qaraganda kuchsizroq hisoblanadi. Korporativ mijozlarga mo‘ljallangan Amazon Q chatboti turli xil baholarga ega.
Biroq Amazon bosh direktori Endi Jassi avvalroq kompaniyaning deyarli har bir bo‘linmasi sun’iy intellekt bo‘yicha qandaydir loyiha ustida ishlayotganini aytgan edi. U, shuningdek, Amazonning sun’iy intellekt bo‘yicha tashabbuslarining yillik daromadi tez orada1 milliard dollardan ko‘proqqa yetishi va kelgusi bir necha yil ichida “o‘nlab milliard dollarlar” olib kelishini ta‘kidladi.
Manbalardan birining xabar berishicha, Jassi Metis ustida ish olib borishda yaqindan ishtirok etadi va jamoaning taraqqiyotini kuzatib boradi.
Izoh (0)