Samolyotda uchish ko‘pchilik uchun odatiy holga aylangan bo‘lsa ham, inson tanasi Yerdan bir necha soat davomida minglab metr balandlikda bo‘lish uchun mo‘ljallanmagan. Shuning uchun parvoz paytida organizmda nima sodir bo‘lishini va stress paytida tanangizga qanday yordam berishingiz mumkinligi haqida ma’lumot beramiz.
Britaniyaning Thorax tibbiyot jurnalida chop etilgan tadqiqot shuni ko‘rsatadiki, parvoz paytida qon bosimi pasayadi va yurak urishi tezlashadi. Bunday alomatlar osmonda Yerdagi kabi bosim darajasi yo‘qligi sababli paydo bo‘ladi. Agar samolyotning konstruktiv xususiyatlari bo‘lmaganida, bort har gal balandlikka ko‘tarilganda hushdan ketardik.
Bosim o‘zgarishi ahvolni sezilarli darajada yomonlashtiradi. Ko‘pchilik quloqlarning bitib qolgani, shuningdek ovqat hazm qilish muammolari — qorin dam bo‘lishi, ich qotishi yoki diareya va oshqozon og‘rig‘idan shikoyat qiladi. Samolyotdagi havo ham organizmga salbiy ta’sir ko‘rsatadi — u Yerdagidan ancha quruqroq bo‘ladi. Shu sababli ko‘plab yo‘lovchilar quruqlashgan teri, doimiy tashnalikni boshdan kechirishadi.
Tadqiqotlar shuni ko‘rsatadiki, uchish psixika uchun – ayniqsa, uchishdan qo‘rqqanlar uchun xavflidir. Parvoz paytida stress gormonlari darajasi oshadi, bu esa hushidan ketish va yurak muammolarini kuchaytirishi mumkin. Shuningdek, parvoz qon aylanishiga juda yomon ta’sir qiladi, ya’ni ular varikoz tomirlari va trombozni qo‘zg‘atishi mumkin. Bularning barchasi bosim, shuningdek, parvoz paytida kam harakatlanish tufayli yuz beradi.
Samolyotda sayohat qilishning kamchiliklariga qaramay, bunday paytda o‘zingizga yordam berishingiz mumkin:
- Samolyot bortida spirtli ichimliklar ichmang. Bu yurak urish tezligini oshiradi va yurakka qo‘shimcha stress yuklaydi. Bundan tashqari, spirtli ichimlik organizmni suvsizlantiradi.
- Ko‘p suv iching. Shu yo‘l bilan tanadagi namlikni normal darajada ushlab turishingiz, shuningdek, ko‘ngil aynishi va bosh og‘rig‘idan xalos bo‘lishingiz mumkin.
- Quloq bitishidan xalos bo‘lish uchun biror narsa yeng yoki iching. Tomoqdagi yutumlar quloqlarga bosimni oshiradi va ular normal holatga qaytadi.
- Parvoz paytida tez-tez harakatlaning. Misol uchun, har 2 soatda bir marta mashq qilish kabi oddiy jismoniy mashqlarni bajaring. Ushbu oddiy harakatlar qon oqimini yaxshilashga yordam beradi.
Ovqatlanishni unutmang. Parvoz paytida to‘g‘ri ovqatlanish, hushidan ketish va zaiflikdan qochish uchun qondagi qand miqdorini normal saqlashga yordam beradi. Oziq-ovqat, shuningdek, oshqozoningizni tinchlantiradi va ovqat hazm qilishni normallashtiradi. Agar aviakompaniya ovqat bermasa, meva, pechenye yoki rezavorlar kabi sog‘lom mahsulotlarni o‘zingiz bilan oling.
Tozalik haqida unutmang. Samolyotdagi idishlar, stollar, o‘rindiqlar, tutqichlar va derazalar har doim ham aviakompaniya xizmati tomonidan yaxshilab tozalanmaydi. Shuning uchun antibakterial salfetkalar bilan yuzalarni artib olishni tavsiya etamiz. Bundan tashqari, qo‘llarni dezinfeksiyalash vositasi yordamida muntazam ravishda tozalash muhim. Buni e’tiborga olish kerak, chunki bakteriyalar va viruslar nam havoga qaraganda quruq havoda tezroq tarqaladi.
Linza taqmang. Linzalaringiz qanchalik innovatsion bo‘lmasin, ularning barchasi ko‘zingizga yetib boradigan kislorod miqdorini cheklaydi. Natijada ko‘zlar yetarli darajada namlanmaydi va quruqlashadi. Sog‘lig‘ingiz uchun eng yaxshi variant — parvoz paytida ko‘zoynak taqishdir.
Izoh (0)