Yaponiya hukumati O‘zbekistondagi Mvizion MChJ kompaniyasiga Rossiya iqtisodi bilan faol aloqalari tufayli sanksiya kiritdi. Bu haqda “TASS” manbasi xabar berdi.
Manbada aytilishicha, Yaponiya 20-iyun kuni Rossiya kompaniyalariga nisbatan sanksiyalari ro‘yxatini yangilagan. Unga ko‘ra, Rossiyadagi yana 11 nafar jismoniy shaxs va 42 ta kompaniyaga nisbatan cheklovlar kiritilgan.
Qaror rasman Yaponiya Vazirlar Mahkamasi tomonidan eʼlon qilingan. Yangi ro‘yxatdagi kompaniyalar Rossiyaning urushini qo‘llashda yoki bilvosita taʼminlashda ayblangan.
Sanksiyalar ro‘yxatining dastlabki o‘rinlaridan Rossiya Markaziy saylov komissiyasi kotibi Natalya Budarina va komissiyaning yana besh aʼzosi, shuningdek, “Taktik raketalar” korporatsiyasi rahbari Boris Obnosov, “Uralvagonzavod” bosh direktori Aleksandr Potapov va “Soyuz” samolyot dvigatellari ilmiy-texnika majmuasi bosh konstruktori Mkrtich Okroyanlar joy egallagan.
Qora ro‘yxatga kiritilgan kompaniyalar orasida rossiyalik olmos qazib oluvchi “Alrosa” birlashmasi, shuningdek, “Tupolev” va “Ilyushin” samolyot ishlab chiqaruvchilari ham bor.
Yaponiya hukumati, o‘z navbatida, Rossiya Federal yadro markazi, Chelyabinsk traktor zavodi, Degtyaryov zavodi, Ijevsk-Kupol elektromexanika zavodi, Perm porox zavodi kabi bir qancha mashinasozlik va mudofaa sohasi kompaniyalari hamda Nijniy Novgoroddagi “G‘alabaning 70 yilligi”, Arzamas zavodi, Almaz Antey konsernining shimoliy-g‘arbiy mintaqaviy markazi Obuxovskiy harbiy zavodlariga ham cheklov kiritgan. Ushbu birlashmalarning aktivlari Yaponiyada aniqlanadigan bo‘lsa, bloklanishi maʼlum qilingan.
Sanksiyalar ro‘yxatiga bir qator tadqiqot muassasalari ham kiritilgan. Xususan, “Alabuga” maxsus iqtisodiy zonasi, “Vega” radiotexnika korporatsiyasi, “Vniir-Progress” ilmiy-tadqiqot instituti, “Geomir” muhandislik markazi va boshqalarga eksport cheklovlari joriy etilgan.
Yaponiya sanksiyalari Rossiyaga aloqador xorijiy kompaniyalarga ham kiritilgan. Xitoyning yetti kompaniyasi, jumladan, Alpha Trading Investments, Guangzhou Ausay Technology va Shenzhen Biguang Trading assotsiatsiyalari qora ro‘yxatga tushgan. Cheklovga tushgan xorijiy korporatsiyalar ichida BAAning Sun Ship Management, Hindistonning Si2 Microsystems, Qozog‘istonning Elem Group va O‘zbekistonning Mvizion MChJ kompaniyalari ham bor.
Izoh (0)