Turk kino sanoatidagi mashhurlarning ijtimoiy tarmoqda joylashtirgan so‘nggi qiziqarli fotosuratlari va yangiliklari bilan tanishamiz.
Tomoshabinlarga “Kvest” va “Istanbullik kelin” seriallaridan, shuningdek, Netflix platformasidagi “Ishonchli qo‘llarda” filmi bilan tanish bo‘lgan aktrisa Asli Enver 10 oylik qizi Elay bilan tushgan yangi suratini ijtimoiy tarmoqdagi obunachilari bilan bo‘lishdi.
Asli Enver 2022-yilning noyabr oyida biznesmen Berkin Go‘kbudak bilan turmush qurdi. To‘y rejalashtirilmagan edi, ular farzandi tug‘ilishini kutgan holda, rasman turmush qurishga shoshilgan.
Aktrisa 38 yoshida birinchi marta ona bo‘lganidan juda xursand. U ijtimoiy tarmoqlarda qizining suratlari bilan muntazam bo‘lishib turadi va onalik baxti haqida o‘z fikrlarini bildiradi. 10 oylik moviy ko‘zli qizining yangi suratini joylagan Asli Enver surat ostiga “Ko‘zlarimning guli” deb izoh qoldirdi.
2014-yilda “Yurak ishlari” seriali hamda 2018-yilda “Tong qushi” loyihasida ishtirok etgan aktyor Jan Yaman Turkiyani tark etib, faoliyatini Italiyada davom ettirmoqda.
Kuni kecha Yaman 11 million obunachisi bo‘lgan faol Instagram akkauntini o‘chirib tashladi. Buning sababi sifatida aktyorning karyerasi va obro‘siga putur yetkazayotgan tarmoqdagi ba’zi izohlar va ish vaqtida diqqatni jamlashga xalaqit berishi bilan izohladi. Shuningdek, Instagram’dagi salbiy fikrlar uning emotsional holatiga jiddiy ta’sir qilgan.
Aktyor Burak Yamanturk bir kun avval Istinye tumanida bo‘lib, jurnalistlarning savollariga javob berdi.
Calendar gazetasi xabarlariga ko‘ra, aktyor do‘konlar bo‘ylab aylanib, qizi Koral uchun xaridlar qilgan:
“Havoning harorati baland bo‘lgani biroz meni charchatdi, lekin yaqinlashib kelayotgan bayramda qizimni xursand qilishim lozim edi. Uyga, qizim Koral oldiga quruq qo‘llar bilan qayta olmayman axir”, — dedi aktyor jurnalistlarga javoban.
“Qo‘limni qo‘yib yuborma”, “Sevgi 101”, “Marashlik” filmlari bilan mashhurlikka erishgan aktrisa Alina Boz 6 oy avval restoranlar tarmog‘i direktori Umut Evirgenga turmushga chiqdi.
Hozirda juftlik Bodrumda hordiq chiqarmoqda.
Aktyor Murat Yildirim ham qizalog‘ining fotosuratlarini tez-tez ijtimoiy sahifalarga joylab turadi. TRT telekanalida namoyish etilgan “Razvedka” serialida bosh rolni ijro etgan Murat Yildirim 2016-yilda marokashlik Iman Elbani bilan turmush qurgan. 2022-yil oktyabr oyida juftlikning uzoq kutilgan farzandi — Miray ismli qizi dunyoga keldi.
Jurnalistlarga bergan intervyusida Murat Yildirim o‘zining ikki yoshli qizi haqida ham aytib o‘tdi:
“Men o‘g‘il bolaning otasi bo‘lish qanday ekanligini bilmayman, lekin qiz bolaning otasi bo‘lish ajoyib ekan. Ota va uning qizi o‘rtasida ajib bir rishta, go‘zal sevgi bor. U mening kichik sevgim”, — deydi aktyor.
Ijodiy faoliyatini “Tingla, azizim” va “Yomon yettilik” seriallaridagi kichik rollardan boshlab, “Kichik xonim” serialida mahoratini namoyish etgan aktyor Barish Arduch ham qizaloqning otasi. Arduch jurnalistlarga bergan intervyusida otalik haqidagi his-tuyg‘ulari haqida so‘zlab berdi:
“Endilikda farzandim men uchun katta ko‘zgudir. Uning yuzida baxt va quvonchni ko‘rish men uchun eng katta mukofot. Shuning uchun hozirda menga katta kuch va ilhom beradigan inson bu mening qizimdir”.
Calendar Gazette jurnalisti Do‘g‘an Savash xabar berishicha, turk kino sanoatining mashhur juftligi Engin Hepileri va Beyza Shekerji oilaviy baxt siri bilan bo‘lishdi: “Biz bir xil kun tartibi va monotonlikdan qochamiz. Ertangi kun uchun turfa rejalar tuzishni yaxshi ko‘ramiz”, — deydi yulduzlar.
Aktyorlar “Qasos” teleserialini suratga olish jarayonida tanishib qolgan. Serialdagi muhabbat haqiqiy hayotga ko‘chgan va ular tez orada turmush qurishgan. Ularning o‘g‘li Jan boshlang‘ich maktabga chiqish arafasida.
Izoh (0)