Bugun, 14-iyunda Myunxenda Germaniya va Shotlandiya uchrashuvi bilan futbol bo‘yicha Yevropa chempionatining 17-final bosqichi start oladi.
Turnirning ochilishi “Bavariya” klubining uy arenasi — “Allianz Arena”da bo‘lib o‘tadi.
Stadion 75 ming o‘ringa mo‘ljallangan. Mutasaddilar bugun maydon liq to‘lishini kutmoqda. Tribunada shotlandiyalik muxlislarning nechtasi kirishini aniq aytish qiyin, biroq turli hisob-kitoblarga ko‘ra,150 mingga yaqin shotlandlar Germaniyaga yetib kelgan.
Kim qanday holatda?
Nemislar o‘n yildan beri sovrin yutolmayapti. 2014-yilda Braziliyada bo‘lib o‘tgan jahon chempionatida qo‘lga kiritilgan oltin medaldan so‘ng, Germaniya oxirgi uchta yirik turnirning ikkitasida hatto guruhdan chiqa olmadi. O‘tgan yilning sentyabrida Yaponiyadan yirik hisobdagi mag‘lubiyatdan so‘ng (1:4) Hansi Flik ishdan bo‘shatildi va uning o‘rniga “Bavariya”ning sobiq ustozi Yulian Nagelsmann keldi. Yulian startni juda yorqin boshlagani yo‘q, ammo bu yil uning futbolchilari to‘rtta o‘yinda uchta g‘alaba (shu jumladan, Fransiya va Niderlandiya ustidan ham) va bitta durangga erishdi.
Shotlandiyaga kelsak, ko‘pchilik uchun kutilmaganda terma jamoa saralash bosqichida Ispaniya bilan guruhda ikkinchi o‘rinni egalladi. Stiv Klark shogirdlari “Manchester Siti” klubida harakat qiladigan super hujumchisi Erling Hollandi bor norvegiyaliklarni bilan Yevropa chempionatisiz qoldirdi. Klark shotlandlarni ketma-ket ikkinchi marta Yevropa chempionatiga olib chiqqan birinchi murabbiyga aylandi.
Uchrashuvlar tarixi
Rasmiy o‘yinlar hisobga olinsa, Germaniya va Shotlandiya terma jamoalarining yo‘li sakkiz marta “kesishgan”. Nemislar oltita g‘alaba va ikkita durangga 18:9 hisobidagi to‘plar farqi bilan erishgan.
Germaniya oxirgi marta 2016-yilgi Yevropa chempionati uchun saralash o‘yini doirasida shotlandlar bilan to‘qnash kelgan. O‘shanda nemislar 3:2 hisobida g‘alaba qozongan. Uchrashuvda Tomas Myuller dubl qayd etgan bo'lsa, yana bir golga Ilkay Gyundogan mualliflik qildi.
Qiziqarli faktlar
- Yevropa chempionatining tarixi davomida mezbonlar bor-yo‘g‘i uch marta turnirda g‘alaba qozongan. Oxirgi marta bunday holat 1984-yilda sodir bo'lgan, o‘shanda Mishel Platini bosh murabbiyligida Fransiya terma jamoasi o‘z uyida kubokni qo‘lga kiritgan.
- Ochilish uchrashuvida Yevropa chempionati mezbonlari to‘rt marta g‘alaba qozongan. Bunday natija Yevro—2016 da kuzatilgan. O‘shanda Fransiya terma jamoasi Ruminiyani mag‘lub etgandi — 2:1.
- Musobaqalar tarixi davomida shotlandlar Yevropa chempioanatining final bosqichida uch marta ishtirok etishgan. Ular hech qachon guruhdan chiqish vazifasini bajara olmagan. Shotlandlar uchrashuvlarning 2 tasida g‘alaba qozongan, beshta uchrashuvda mag‘lubiyatga uchragan va ikki durang qayd etgan.
- Germaniya Yevrodagi ishtiroklar soni bo‘yicha rekordchi hisoblanadi — bo‘lajak turnir nemislar uchun o‘n to‘rtinchisi hisoblanadi. Nemislar bosh sovrinni uch marta qo‘lga kiritgan. So‘nggi bora bosh sovrin 1996-yilda nemislarga nasib qilgan.
Ushbu uchrashuv bugun, 14-iyun kuni 00:00 da Zo‘r TV telekanali orqali to‘g‘ridan to‘g‘ri namoyish etiladi.
Izoh (0)