12-iyun kuni Toshkent shahrida “Ayollar tadbirkorligida raqamlashtirish va rivojlanish istiqbollari” mavzusida seminar bo‘lib o‘tdi.
Tadbir Ipoteka bank ATIB, Yevropa tiklanish va taraqqiyot banki (ETTB) hamda “Tadbirkor ayol” uyushmasi hamkorligida tashkil etildi.
Seminar ochilishida Ipoteka bank Kichik va o‘rta biznes direksiyasi direktori Behzod Mirzayev YTTB bilan amalga oshirilayotgan “Markaziy Osiyoda biznesdagi ayollar” dasturi haqida gapirdi.
“Ipoteka bank YTTB bilan 2020-yildan beri hamkorlik qilib keladi. Hozirgacha Yevropa tiklanish va taraqqiyot bankidan ikki marotaba 10 million dollardan kredit liniyalari jalb qilganmiz. Shuning hisobidan ayollar biznes loyihalarini moliyalashtirish, xususan, raqamlashtirishga kredit mablag‘lari ajratilgan. 2024-yil boshidan beri bankimiz hisobidan hamda jalb qilingan mablag‘lardan 254 nafar tadbirkor ayolga 80,2 milliard so‘m kreditlar ajratildi. Natijada 114 ta yangi ish o‘rni yaratildi”,—dedi bank vakili.
Joriy yilda Ipoteka bank va YTTB bilan hamkorlikdagi kelishuvga asosan, 3 million dollar miqdoridagi mablag‘lar tadbirkorlikni raqamlashtirishga yo‘naltiriladi.
Raqamli texnologiyalar vaziri maslahatchisi Kamola Sobirova “Daryo” muxbiri bilan suhbatda tadbirning ahamiyati haqida fikr bildirdi.
“Jamiyatimizda faol mavzulardan biri bu ayollar. Bugungi seminar ayollar tadbirkorligi va biznes ko‘nikmalarini rivojlantirish maqsadida tashkil etilgani meni xursand qildi. Muloqotda juda dolzarb mavzularda suhbatlashildi. O‘ylaymanki, tadbirkor ayollar o‘zlari uchun ko‘plab foydali maʼlumotlar oldi. Bunday tadbirlar ishtirokchilar networkingini oshiradi, keyinchalik olgan bilimlarini biznesini rivojlantirishga tadbiq etishga turtki beradi”, — dedi vazir maslahatchisi.
Hozirda Ipoteka bank filiallari 50 mingdan ortiq kichik biznes subyektlariga xizmat ko‘rsatmoqda. Shundan 13 mingdan ortig‘ini tadbirkor ayollar tashkil etadi. Bank ayollar uchun nafaqat kredit ajratish, balki ularning tadbirkorlikdagi bilimlarini oshirish uchun o‘quv seminarlari uyushtirib kelmoqda.
“Miss Lighting” MCHJ taʼsischisi, tadbirkor Umida Rahmonova Ipoteka bank va YTTB ko‘magida biznesini raqamlashtirishga erishganini aytdi.
“Korxonamizda led lampalari va qandillar ishlab chiqariladi. 2021-yilda Ipoteka bank va YTTB tomonidan biznesimizni raqamlashtirish uchun 10 ming dollar grant ajratildi. Keyin Yevropadan ekspertlar yollab, qisqa muddatda marketpleys yaratdik. Natijada kompaniyamiz raqamlashdi va bu biz uchun juda katta yutuq bo‘ldi. Yaʼni oddiy korxonadan raqamlashtirilgan korxona bosqichiga o‘tdik. Bugungi kunda o‘z mahsulotlarimizni jahon bozoriga olib chiqmoqdamiz. Bir nechta davlatlarda filiallarimiz ochilgan”, — dedi tadbirkor.
Seminarda Ipoteka bank tomonidan ayol tadbirkorlar uchun taqdim etilayotgan bank mahsulotlari, biznesni raqamlashtirish orqali jahon bozorlarida o‘z o‘rniga ega bo‘lish imkoniyatlari hamda “Anor” onlayn platformasi to‘g‘risida maʼlumot berildi.
Qayd etilishicha, yaqin kunlarda Ipoteka bank va Xalqaro moliya korporatsiyasi o‘rtasida 20 million dollar miqdoridagi shartnoma imzolanishi kutilmoqda.
Mazkur mablag‘larning 25 foizi ayollar tadbirkorligini moliyalashtirishga yo‘naltiriladi.
Reklama huquqi asosida.
Izoh (0)