Portugaliyalik futbolchi Krishtianu Ronaldu Yevro—2024 turniriga tayyor ekanligini aytib o‘tdi.
“Men tayyorman, juda yaxshi formadaman. 100% professionalman. Bu — mening hayotim. Men har doim o‘zimga 80 yoki 90 emas, 100 beraman. Mamlakatimga, jamoamga yordam berishga tayyorman.
Endi eng asosiysi — murabbiyning qarorini hurmat qilish qoldi: yo o‘ynaysan, yoki o‘ynamaysan. Hozirgi avloddan maksimum foydalanib, Yevroda qandaydir chiroyli natijani chiqara olish kerak”, — deydi Ronaldu.
Portugaliya terma jamoasi Irlandiyaga qarshi o‘rtoqlik o‘yinida 3:0 hisobida g‘alaba qozondi. Uchrashuvda Krishtianu dubl muallifiga aylandi.
39 yoshli futbolchi faoliyatida davomidagi gollari sonini 895 taga yetkazdi. Undan 130 tasi Portugaliya termasi safida urilgan bo‘lsa, qolgan 765 tasi klublar miqyosida kiritilgan.
2024-yilgi Yevropa chempionati Germaniyada bo‘lib o‘tadi. Turnir 14-iyundan 14-iyulga qadar davom etadi. Guruhda birinchi va ikkinchi o‘rinlarni egallagan jamoalar, shuningdek, to‘rtta eng yaxshi uchinchi o‘rin egalari 1/8 finalga yo‘l oladi.
Izoh (0)