Buxoro shahar Alpomish ko‘chasida joylashgan “F.S.P” MCHJga qarashli quruq qorishma ishlab chiqaruvchi korxona o‘zboshimchalik bilan 72 992 metr kub tabiiy gazdan noqonuniy foydalangan. Bu haqda “Hududgaz Buxoro” gaz taʼminoti filiali matbuot xizmati xabar berdi.
Maʼlum qilinishicha, noto‘g‘ri xatti-harakati sabab isteʼmolchi 109 mln 488 ming so‘m miqdorida jarimaga tortildi.
Olib borilgan o‘rganishlar davomida Buxoro shahar Sanoatchilar ko‘chasida joylashgan “T.t.S.” xususiy korxonasida shartnoma va loyiha-texnik hujjatlaridan tashqari TPQ 500l qozonidan foydalanib kelinayotganligi aniqlangan.
Isteʼmolchi 8846 metr kub tabiiy gazni noqonuniy ishlatgan. Bu bilan esa 13 mln 269 ming so‘m miqdorida zarar yetkazilgan.
Buxoro shahar A.Jomiy va A.Somiy ko‘chalari kesishmasida joylashgan “I.G.S” masʼuliyati cheklangan jamiyatiga qarashli umumiy ovqatlanish binosida ham loyiha-texnik hujjatlardan tashqari qo‘lbola gaz jihozidan foydalanilayotganligi aniqlandi. Natijada 6473 metr kub tabiiy gazdan noqonuniy foydalanilgan va 6 mln 138 ming so‘mlik zarar yetkazilgan.
Har bir aniqlangan holat asosida dalolatnoma rasmiylashtirilib, tegishli tartibda chora ko‘rish maqsadida huquq tartibot organlariga taqdim qilindi.
Izoh (0)