Chexiya 2025-yilning birinchi yarmidan Rossiya nefti xaridini to‘xtatmoqchi. Bu haqda mamlakat bosh vaziri Petr Fiala xabar berdi.
Rossiya neftidan voz kechish Chexiyaga olib boruvchi hamda Italiya va Germaniyani kesib o‘tuvchi Transalp gaz quvurini (TAL) kengaytirish orqali amalga oshiriladi. Ma’lum bo‘lishicha, TAL modernizatsiya qilingandan so‘ng, Chexiyaga kiradigan neftning hajmi sakkiz million tonnaga yetadi.
TAL gaz quvurlarini kengaytirish ishlari allaqachon boshlandi. Uning faoliyati 2025-yilning birinchi yarmidan kechikmay boshlanishini kutamiz, — dedi Chexiya bosh vaziri.
AFP’ga ko‘ra, Chexiyaga neftning asosiy qismi Rossiyaning “Drujba” gaz quvurlaridan kirib keladi. Rossiya-Ukraina urushi boshlangandan so‘ng, Yevropa Ittifoqi Rossiya neftiga cheklovlar kiritgan, biroq “Drujba” quvurini sanksiyalar ro‘yxatidan olib tashlagan.
Biz bu istisnoni iloji boricha tezroq bekor qilamiz, — degan edi Fiala.
Prague Monitor hisobotiga ko‘ra, 2023-yilda Rossiya neftini Chexiyaga olib kirish 2012-yildan beri rekord darajaga yetgan. 2023-yilning birinchi yarmida Chexiya importida Rossiya neftining ulushi 65 foizni tashkil etgan.
Izoh (0)