Yevroparlamentning Bryussel va Strasburgdagi ofislarida Rossiyaning taʼsiri bo‘yicha tergov doirasida tintuvlar boshlandi. Bu haqda Der Spiegel nashri xabar berdi.
Xabarga ko‘ra, reydlar “Yevropa ovozi” axborot portali faoliyati bilan bog‘liq bo‘lib, u Rossiyaning ta’sir o‘tkazish amaliyoti markazida turgani aytilgan. Tintuvlar niderlandiyalik parlamentariy xodimi Marsel de Graaf Giyom P. kabinetida olib borilmoqda.
Belgiya prokuraturasi reydni “aralashuv, passiv korrupsiya va jinoiy tashkilotga a’zolik ishining bir qismi” deb atagan. Huquq-tartibot idorasiga ko‘ra, tintuvlar Rossiya aralashuvi alomatlari bilan bog‘liq, buning natijasida Yevroparlament a’zolariga “Yevropa ovozi” axborot sayti orqali Rossiya propagandasini targ‘ib qilish uchun pul to‘langan.
Tekshiruv haqida avvalroq Belgiya bosh vaziri Aleksandr de Kro e’lon qilgan edi. Unga ko‘ra, razvedka Yevropa Ittifoqida Ukrainani qo‘llab-quvvatlashga putur yetkazmoqchi bo‘lgan tarmoq mavjudligini tasdiqlagan. U, shuningdek, Yevroparlament a’zolariga Rossiya tashviqotini targ‘ib qilish uchun pul taklif qilishganini aytgan.
Moskvaning maqsadlari juda aniq. Maqsad – Yevroparlamentga ko‘proq rossiyaparast nomzodlarni saylashga yordam berish, — dedi de Kro.
Avvalroq Chexiya “Yevropa ovozi” portaliga qarshi sanksiyalar kiritgan edi. Chexiya rasmiylari Pragada joylashgan portal Moskvaning ta’sir qilish vositasi ekanligiga ishonch bildirgan. Chexiya razvedka xizmatiga ko‘ra, nashr orqali Yevropa saylovlarida Rossiyaga do‘st bo‘lgan nomzodlarga moliyaviy yordam ko‘rsatilgan.
Izoh (0)