Peru bosh prokuraturasi prezidentni poraxo‘rlikda aybladi

Peru bosh prokuraturasi Kongressga mamlakat prezidenti Dina Boluartega nisbatan konstitutsiyaviy shikoyat yubordi. Davlat rahbari pora olganlikda ayblanmoqda. Bu haqda Reuters xabar berdi.

Agar Kongress shikoyatni qabul qilsa, vaziyat prezidentning iste’foga chiqishiga olib kelishi mumkin. Boluartega nisbatan tergov 10 mingga yaqin fotosuratlar tahlili asosida prezidentning 14 ta qimmatbaho soatlari borligi aniqlangach boshlangan.

Prezident po‘lat va pushti tilladan yasalgan Rolex soatini ham taqqan, uning narxi 6 ming dollardan 14 ming dollargacha baholanadi. Peru prezidentining maoshi esa taxminan 11 ming dollarni tashkil qiladi. Prezident Rolex soati borligini inkor etmagan va boshqa amaldordan uni taqib turishga olganini aytgan.

Mart oyi oxirida prezident qarorgohida tintuv o‘tkazilgandan so‘ng, Kongressning 25 aʼzosidan iborat guruh Boluartega impichment eʼlon qilish tashabbusi bilan chiqdi. Prezident qarorgohidagi tintuvlarni “nomutanosib va ​​haqoratli chora” deb atadi va iste’foga chiqishini rad etdi.

“Men toza qo‘llar bilan lavozimga kirishganman va shu bilan 2026-yilda prezidentlik lavozimini tark etaman”, — degan u.

Tintuvlar Peru bosh vaziri Gustavo Adriansen tomonidan ham tanqid qilingan.