Toshkent shahridagi barcha yorug‘lik diodli (LED) ekranlardagi tashqi reklama obyektlarining yorug‘lik darajasi yaqin ikki oy ichida meʼyorga keltiriladi. Bu haqda shahar hokimligi huzuridagi Raqamli rivojlanish departamenti Tashqi reklama loyiha ofisi rahbari Alixon Ahmadjonov maʼlum qildi.
Ahmadjonovning so‘zlariga ko‘ra, hokimlikka aholi va shahar mehmonlari tomonidan shahar hududiga o‘rnatilgan LED ekranlardagi reklamalarning yorug‘lik darajasi yuzasidan murojaatlar kelib tushgan. Shu sababli hozirda ushbu ekranlarni masofadan turib yorug‘lik o‘lchash uskunalari orqali tekshirish boshlangan. Dastlabki o‘rganish natijasida shahardagi ekranlarning 90 foizdan ko‘p qismi meʼyordan yuqori yorug‘lik tarqatishi aniqlangan.
Yorug‘likni meʼyorga keltirish jarayoni boshlanganda biz shunaqa holatlarni ko‘rdikki, ayrim LED ekranlarning yorug‘lik darajasi tunning qorong‘i vaqtida meʼyoridan 50 baravargacha yuqori bo‘lgan. Shaharsozlik normalarida tungi vaqtda yorug‘lik diodli monitorlarning maksimal yorug‘lik darajasi 100 kandel/kvadrat metr etib ko‘rsatilgan. Va biz hozirgi monitorlarni joyiga chiqqan holda o‘lchab, shu 100 kandel/kvadrat metr daraja meʼyorgacha keltirish ishlarini olib bormoqdamiz, — deya tushuntirdi loyiha ofisi rahbari.
Uning qo‘shimcha qilishicha, yorug‘lik darajasini buzganlik uchun hech qanday jazo mavjud emas. Lekin hozirda “Hududiy elektr tarmoqlari” bilan birgalikda ushbu ekranlar egalari tomonidan meʼyorga keltirilmagan taqdirda, ularni majburiy tartibda elektr tarmog‘idan uzish rejalashtirilmoqda.
Eslatib o‘tamiz, Toshkent shahrida reklama konstruksiyalarini ommaviy buzib tashlash ishlari 2021-yil 8-apreldan boshlagan edi. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. O‘shanda tadbirkorlar hukumatning harakatini noqonuniy deb aytgan, chunki bannerlar sud qarorisiz buzib tashlangan.
Reklama sohasidagi tadbirkorlar hatto ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab prezident Shavkat Mirziyoyevga murojaat yo‘llagan. Monopoliyaga qarshi kurashish qo‘mitasi poytaxtdagi reklama konstruksiyalarning yarmi talabga javob bermasligini bildirib, tomonlarni qonunchilikka rioya qilishga chaqirgandi.
Izoh (0)