“Men kelib, ikkala qulog‘ingni ham yulib olaman!”. “Yuventus” bosh murabbiyi jurnalistga tahdid qildi

Massimiliano Allegri Italiya kubogi finalidan keyin jurnalistga tahdid qildi.

Turnir finalida “Yuventus” “Atalanta” ustidan 1:0 hisobida g‘alaba qozonib, kubokni qo‘lga kiritdi.

Tuttosport bosh muharriri Gido Vakyago matbuot xonasiga olib boruvchi koridorda “Yuve” bosh murabbiyi bilan janjallashib qolganini aytdi.

“Allegri juda norozi edi. U g‘alaba qozongan oqshomda matbuot anjumanida qatnashish majburiyatidan ko‘ra menga baqirishga vaqt topdi”, — deydi Gido Vakyago.

U jurnalistga “Siz axloqsiz muharrirsiz. Gazetangizga klublar aytganini emas, haqiqatni yozing! Klublar bilan noz-karashma qilishni bas qiling”, deb aytgan. 

Jurnalist unga tinchlanishini va u yashirayotgan haqiqat nima ekanligini so‘raganida, u muharrirni turtgan va barmog‘ini burni ostiga olib kelib baqirgan.

“Eshitvol, men seni qayerdan topishni bilaman. Men kelib ikkala qulog‘ingni ham yulib olaman. Yuzingni ham bejab qo‘yaman. Gazetaga haqiqatni yoz”. 

Shu payt “Yuventus” matbuot xizmati xodimi Gabriella Ravizzotti va Italiya A Seriyasi xodimi uni olib ketgan. Ular bosh murabbiyni matbuot markaziga olib borishga ham muvaffaq bo‘lgan.