Qozog‘iston qo‘shimcha vaksinalar va dori-darmonlar xarid qilish maqsadida bolalarni xavfli kasalliklarga qarshi emlash uchun 13 million dollar mablag‘ ajratdi. Bu haqda Qozog‘iston Respublikasi hukumati xabar berdi.
Milliy emlash taqvimi doirasida emlashni o‘tkazib yuborgan 18 yoshgacha bo‘lgan bolalarni emlash uchun davlat zaxirasidan 13 million dollar ajratilgan. Mamlakatda 800 mingdan ortiq emlanmagan bolalar aniqlangan.
Emlash dasturi ko‘k yo‘tal, difteriya, A va B virusli gepatiti, qizamiq, qizilcha, qoqshol, poliomielit, parotit va pfayfer tayoqchasi kabi kasalliklarni qamrab oladi.
Ushbu mablag‘ Qozog‘istonning turli viloyatlariga 747 720 doza vaksina va 542 592 shprits sotib olish uchun yuboriladi.
Qozog‘iston Sog‘liqni saqlash vazirligi taʼkidlaganidek, mamlakatda so‘nggi ikki oyda emlash tufayli qizamiq bilan kasallanganlar soni 32 foizga kamaygan. 1,3 millionga yaqin odam, ya’ni maqsadli aholining 91 foizi emlangan.
Biroq, boshqa oldini olish mumkin bo‘lgan kasalliklar ko‘paymoqda. Misol uchun, 2023-yilda ko‘k yo‘tal bilan kasallanganlar soni ortib, 91% holatlar emlanmagan bolalarda uchragan. Qizilcha, parotit va virusli gepatit A bilan kasallanganlar soni ham oshgan, — deyiladi xabarda.
Izoh (0)