Armaniston politsiyasi 14-may kuni hukumat isteʼfosini talab qilib, norozilik uyushtirgan 63 nafar fuqaroni hibsga olgan. Bu haqda Armaniston Ichki ishlar vazirligi xabariga tayanib, “TASS” nashri xabar berdi.
Manbada aytilishicha, hibsga olinganlar poytaxt Yerevan ko‘chalarini to‘sib qo‘ygan. Politsiya ularni to‘xtashga chaqirgan, talab rad etilgach esa hibsga olish chorasi qo‘llangan.
Holat dushanba kungi internetdagi chaqiriqlar ortidan yuzaga kelgani xabar qilingan. O‘sha kuni Armanistonning “Tavush” muxolifat harakati yetakchisi arxiyepiskop Bagrat fuqarolarni hukumatga bo‘ysunmaslikka chaqirgan.
Fuqaroviy bo‘ysunmaslikka undashdan maqsad hukumatni isteʼfoga chiqarishga erishish bo‘lgan. Rahbariyatdan norozi bo‘lgan poytaxtning ko‘plab fuqarolari bu chaqiriqlarga qo‘shilgan.
“63 nafar faolning barchasi militsiya xodimlarining qonuniy talablariga bo‘ysunmagani uchun militsiya bo‘limlariga olib ketildi”, — deyiladi Armaniston Ichki ishlar vazirligi rasmiy xabarida.
Izoh (0)