Markaziy bank to‘qqizta bankni jarimaga tortdi

Markaziy bank aprel oyida 9 ta tijorat bankini jarimaga tortdi. Bu haqda bank matbuot xizmati xabar berdi.

Bank nazorati qo‘mitasi tomonidan o‘tgan oyidagi yig‘ilishlarda 49 ta masala ko‘rilib, ular bo‘yicha tegishli qarorlar qabul qilingan. Xususan, ro‘yxatga olish va ruxsat berish yo‘nalishida 34 ta masala ko‘rib chiqilgan.

Shu bilan birga, banklar va to‘lov tashkilotlarida Markaziy bankning ko‘rsatmalari va prudensial me’yorlari talablarining bajarilishi, banklar va mikromoliya tashkilotlarida o‘tkazilgan tekshirishlar natijalari (15 ta masala) ham muhokama qilingan.

Tijorat banklari va mikromoliya tashkilotlarida o‘tkazilgan o‘rganishlar natijasida aniqlangan qoidabuzarliklar uchun 16 ta bank va 2 ta mikromoliya tashkiloti chora va sanksiyalar qo‘llanilishi to‘g‘risida ogohlantirilgan. Shuningdek, ustav kapitalining miqdori “Banklar va bank faoliyati to‘g‘risida”gi qonun talablariga muvofiqlashtirilmagani sababli 4 ta bankning ayrim operatsiyalari cheklangan.

Amaldagi qonunchilik va Markaziy bank tomonidan o‘rnatilgan iqtisodiy me’yorlar talablariga rioya qilinmagani va aniqlangan qoidabuzarliklar uchun 9 ta bankka nisbatan jarima sanksiyalari qo‘llanilgan.

Eslatib o‘tamiz, 2024-yilning 1-aprelidan banklar ustav kapitalining eng kam miqdori 350 milliard so‘mga oshirilishi belgilangandi.