Toshkent aeroportida mobil qurilmalarning IMEI kodlarini ro‘yxatdan o‘tkazish shoxobchasi ochildi. Bu haqda Uzbekistan Airports matbuot xizmati xabar berdi.
Qayd etilishicha, maydoni 8 kvadrat metr bo‘lgan xizmat ko‘rsatish shoxobchasi “E-auksion.uz” elektron platformasi orqali o‘ynalgan. O‘zbekiston telekommunikatsiya tarmoqlarini boshqarish Respublika markazi kimoshdi savdosi g‘olibi deb topilgan.
Mazkur shoxobchada uchib kelgan barcha yo‘lovchilar bir necha daqiqa ichida import qilingan (yangi yoki O‘zbekistondan tashqarida foydalanilgan) mobil qurilmalarning IMEI kodlarini ro‘yxatdan o‘tkazishlari mumkin. IMEI kodini ro‘yxatdan o‘tkazish narxi rezidentlar uchun 30 kalendar kun ichida, norezidentlar uchun esa 60 kalendar kun ichida 68 ming so‘mni (BXMning 20 foizi) tashkil etadi.
O‘zbekiston qonunchiligiga muvofiq, mobil qurilma IMEI kodini ro‘yxatdan o‘tkazish mahalliy uyali aloqa operatorlarining SIM-kartalari ulangan kundan boshlab 30 kalendar kun (norezidentlar uchun 60 kalendar kun) ichida amalga oshirilishi kerak. Aks holda, qurilmaning IMEI kodini ro‘yxatdan o‘tkazilguniga qadar abonentga mahalliy GSM uyali aloqa operatorlari xizmatlaridan foydalanish taqiqlanadi.
Eslatib o‘tamiz, O‘zbekistondagi mobil telefonlar maxsus IMEI kodi bo‘yicha ro‘yxatga olinishi tartibi 2019-yil 1-apreldan joriy etilgan. 2020-yil 22-sentyabr kuni mobil qurilmalarning IMEI kodlarini ro‘yxatdan o‘tkazish tizimi ma’muriyati tomonidan mobil qurilmalarni UzIMEI tizimida ro‘yxatdan o‘tkazish jarayoniga o‘zgartirish kiritilgan, unga ko‘ra, qurilmaning IMEI kodini/kodlarini ro‘yxatdan o‘tkazishda jismoniy shaxslar tomonidan foydalaniladigan abonent raqami mahalliy mobil operatorlaridan ariza beruvchi nomiga rasmiylashtirilgan bo‘lishi kerakligi belgilangandi. Qator OAV va blogerlar mazkur o‘zgarish qonunga zid ravishda amalga oshirilgan bo‘lishi mumkinligini bildirgan.
2021-yilda Axborot texnologiyalari va kommunikatsiyalarini rivojlantirish vaziri Sherzod Shermatov “O‘zbekiston telekommunikatsiya tarmoqlarini boshqarish Respublika markazi” davlat unitar korxonasi faoliyati bilan tanishish davomida “IMEI kodlarini ro‘yxatdan o‘tkazishni yanada osonlashtirishimiz kerak” degandi.
Izoh (0)