Italiyaning “Atalanta” klubi hujumkor yarim himoyachisi Tyon Kopmeyners yozgi transfer oynasida “Liverpul” safiga qo‘shilishi mumkin.
Daily Mail nashrining xabariga ko‘ra, “Feyenoord” murabbiyi Arne Slot “qizillar” boshqaruviga o‘tgach, dastlabki qiladigan ishi rahbariyatni niderlandiyalik futbolchini xarid qilishga ko‘ndirish bo‘ladi. “Atalanta” Kopmeyners uchun 50 million yevro talab qiladi.
Eslatib o‘tamiz, “Liverpul” 45 yoshli Arne Slotni bosh murabbiy sifatida olib kelishi xabar qilingandi. Mersisaydliklar Slot “Feyenoord” bilan bitimini buzishi uchun Niderlandiya klubiga 13-15 million yevro to‘lab beradi.
26 yoshli Tyon Kopmeyners 2021-yil avgust oyidan buyon “Atalanta” safida to‘p surib kelmoqda. Unga qadar futbolchi Arne Slot murabbiylik qilgan “AZ Alkmar” jamoasi sharafini himoya qilgan. Joriy mavsumda Tyon barcha musobaqalarda 43 ta o‘yin o‘tkazib, 14 ta gol va 5 ta golli uzatmaga mualliflik qildi.
Kopmeyners Transfermarktda 40 million yevroga baholangan.
Izoh (0)