Qirg‘iziston prezidenti Sadir Japarov “Qirg‘iziston respublikasining ayrim qonun hujjatlariga o‘zgartishlar kiritish to‘g‘risida”gi qonunni imzoladi. Bu haqda prezident matbuot xizmati xabar berdi.
“Atrof-muhitni muhofaza qilish to‘g‘risida”, “Qirg‘iziston Respublikasida yo‘l harakati to‘g‘risida”gi qonunlarga o‘zgartirishlar kiritilgan. Tegishli qonun Jogorku Kenesh tomonidan 2024-yil 14-martda qabul qilingan.
Unda elektrodvigatelli g‘ildirakli transport vositalaridan foydalanish uchun imtiyozlar berish va elektromobillar uchun quvvatlanish infratuzilmasini yaratish ko‘zda tutilgan. Shuningdek, elektromobillar davlat ro‘yxatidan o‘tkazilganda ularga maxsus yashil rangdagi davlat raqamlari berilishi belgilangan.
Qirg‘izistonga asosan elektromobillar Xitoydan buyurtma qilinadi. Xitoy bozorida taqdim etilgan har qanday markadagi ichki yonuv dvigateli bo‘lmagan avtomobilni Qirg‘izistonga olib kelish mumkin. Qo‘shni respublikada Changan, Honda, Renault, Toyota, BYD, Tesla, Volkswagen va Haval elektromobillariga talab yuqori.
2023-yilgi ma’lumotlarga ko‘ra, Qirg‘iziston bozorida elektromobillarning narxi quyidagicha:
- byudjet klass — 10 000 dollardan;
- o‘rta klass — 20 000 dollardan 40 000 dollargacha;
- lyuks klass — 50 000 dollardan va undan yuqori.
Avtomobil sotuvchilari va ekspertlarning taʼkidlashicha, Qirg‘izistonda elektrotransport rivojlanishining asosiy muammosi uning oddiy fuqarolarga yetib bora olmasligidir.
“Elektr transporti rivojlanmayotganining asosiy omili bank tizimidir. Bizda kredit stavkalari juda yuqori — 20 foizdan ortiq, bu bizga elektromobillarni ommaviy sotib olishga imkon bermaydi. O‘rta darajali mutaxassis yoki 300-400 dollar maosh oladigan davlat xizmatchisi elektromobil sotib olishga qurbi yetmaydi”, — deydi Voltauto direktori Aydar Konurbayev.
Uning fikricha, hukumat elektr transportini rivojlantirish uchun banklarni subsidiyalashi kerak.
Izoh (0)