“Barselona” prezidenti Xoan Laporta “El klasiko” qayta o‘tkazilishi mumkinligini inkor etmayapti.
La Liganing 32-turidan o‘rin olgan o‘yinda “Barselona” vingeri Lamin Yamal burchakdan uzatilgan to‘pni darvoza tomon to‘g‘rilab yubordi. To‘pni esa darvozabon Andrey Lunin qaytarib yubordi. Bosh hakam Sesar Soto Grado gol bo‘lmaganini ta’kidladi. Shundan so‘ng videoassistentiga murojaat qildi va yakunda baribir o‘z qarorida qoldi.
“Barselona” “Real”ga 2:3 hisobida mag‘lub bo‘ldi.
“Hakamlar qanday qiyinchiliklarga duch kelishini bilamiz, ammo VAR kabi jihozlar aynan shunday vaziyatlar uchun kerak bo‘ladi.
O‘yin payti bir nechta bahsli vaziyatlar yuzaga keldi, ulardan biri o‘yin taqdirini o‘zgartirib yuborishi ham mumkin bo‘lgan Laminning zarbasidir.
Klub sifatida biz nima bo‘lganini bilishni istaymiz va aynan shu sababdan “Barselona” zudlik bilan Ispaniya Qirollik futbol federatsiyasining texnik hakamlar qo‘mitasi bilan bog‘lanib, ushbu voqeaning to‘liq video va audio yozuvlarini to‘playdi.
Agar ushbu hujjatlarni ko‘rib chiqqandan so‘ng, klub voqeani hal qilishda xatolikka yo‘l qo‘yilganini anglasa, biz vaziyatni to‘g‘rilash uchun barcha choralarni, shu jumladan, qonuniy choralarni ham ko‘ramiz.
Agar gol bo‘lgani isbotlansa, yana harakatni davom ettirib, o‘yinni qaytadan o‘tkazishga kelishishimiz ham mumkin. Yevropadagi yana bir o‘yinda aynan VAR xatosi tufayli o‘yin qayta o‘tkazilgan”, — deydi Laporta.
Qayd etib o‘tamiz, yanvar oyida VAR xatosi tufayli Belgiya chempionati doirasidagi “Anderlext” va “Genk” o‘rtasidagi o‘yin qaytadan o‘tkazilgan.
Izoh (0)