Xorazm viloyatining Urganch shahrida tanishini uyiga chaqirib, o‘ldirgan ayol qamoqqa olindi. Bu haqda Xorazm viloyati prokuraturasi matbuot xizmati xabar berdi.
Xabarga ko‘ra, jinoyat 17-aprel kuni Urganchning “Hamjihatlik” mahallasida sodir bo‘lgan. 1986-yilda tug‘ilgan ayol o‘ziga avvaldan tanish, 1975-yilda tug‘ilgan ayolni uyiga chaqirgan.
O‘zaro suhbatda ikki ayol o‘rtasida pul bilan bog‘liq nizo kelib chiqqan. Suhbat janjalga aylangach, uy egasi ro‘mol bilan mehmon ayolning bo‘ynidan bo‘g‘ib, o‘ldirib qo‘ygan. Qilgan jinoyatini yashirish maqsadida ayol murdani hovliga ko‘mgan.
Jinoyat tergov-tezkor guruhi tomonidan qisqa fursatda fosh etilgan. Gumonlanuvchi ehtiyot chorasi sifatida qamoqqa olingan.
Hozirda jinoyat bo‘yicha dastlabki tergov harakatlari viloyat prokuraturasining o‘ta og‘ir jinoyatlarni tergov qilish bo‘limi tomonidan olib borilmoqda.
Izoh (0)