“Bavariya” Kloppni 2025-yilda bosh murabbiy etib tayinlaydi

“Liverpul” bosh murabbiyi Yurgen Klopp mavsum yakunida ingliz klubini tark etadi.

Focus bergan xabarga ko‘ra, Myunxenning “Bavariya” klubi hozirda Kloppni 2025-yilning yozida jamoaga bosh murabbiy etib tayinlash variantini ko‘rib chiqmoqda. Shu bilan birga, jamoa rahbariyati 2024—2025-yilgi mavsum uchun ishlovchi murabbiyni ham izlashi talab etiladi. Qayd etilishicha, Xans-Diter Flik myunxenliklar jamoasiga vaqtinchalik murabbiy bo‘lishi mumkin.

Eslatib o‘tamiz, yanvar oyida Yurgen Klopp joriy mavsum yakunida “Liverpul”ni tark etishini ma’lum qilgandi. Nemis mutaxassisi o‘z bayonotida endi jamoani boshqarishga kuch-quvvati yo‘qligini aytib o‘tgan.

56 yoshli germaniyalik mutaxassis 2015-yilning 8-oktyabrida Angliyaning “Liverpul” klubi boshqaruviga kelgan. Bu vaqt ichida Yurgen Klopp “qizillar” bilan yettita sovrinni qo‘lga kiritdi. Klopp qo‘l ostida “Liverpul” Chempionlar Ligasi, Premyer Liga, Liga Kubogi, Angliya Kubogi, UEFA Superkubogi va klublar o‘rtasidagi jahon chempionatida g‘olib chiqdi.