Ijtimoiy tarmoqlarda sartarosh mijoz sifatida kelgan yigitning sochini jahl ustida kalga olib tashlagani aks etgan videolar tarqalgach, sartarosh uzr so‘rab chiqqan edi. Viloyat IIBBga ko‘ra, unga sud hukmi o‘qildi.
Videoda yigit soch va soqolini qanday olishni noto‘g‘ri tushuntirgani uchun sartaroshning jahli chiqqanini va kalga olish orqali undan qasd olganini ko‘rish mumkin. Shuningdek, sartarosh bu ishni qilishdan oldin undan nima ishda ishlashini so‘rab olgan. Yigit bobosining qo‘lida ishlashini aytgan.
“Kimni chaqirasan endi, buvingni chaqirasanmi?” — degan sartarosh. Yigit shunda ham undan uzr so‘ragan va adashganini aytgan.
Sartarosh esa qilgan ishiga quyidagicha izoh berdi va uzr so‘radi: “Xizmat vaqtimda menga notanish bo‘lgan fuqaro soch oldirish uchun keldi. Sochingni olaymi, soqolingnimi, deb 3-4 marta so‘radim. U sochimni oling, soqolimni oling, dedi. Jahl ustida qizishib ketib kalga olib tashladim. Undan, ota-onasi, aka-ukalari, yaqinlaridan uzr so‘rayman. Holat bo‘yicha har qanday jazoga roziman. Qilgan ishimdan pushaymonman. O‘zbekiston xalqidan uzr so‘rayman”.
Jinoyat ishlari bo‘yicha Toshkent tumanida o‘tkazilgan sud majlisida sartaroshga nisbatan Ma’muriy javobgarlik to‘g‘risidagi kodeksning 183-moddasiga asosan 10 sutka ma’muriy qamoq jazosi, jarayonni videoga olgan shaxsga nisbatan esa MJtKning 46-2-moddasiga asosan ma’muriy jarima jazosi qo‘llanildi.
Izoh (0)