Oliy Majlis Senati raisi Tanzila Norboyeva Qashqadaryo viloyatiga amaliy tashrifi doirasida Koson tumanining Qamashi qishlog‘idagi “Obod” mahalla markazida viloyatning tuman va shaharlari hokimlari o‘rnibosarlari — oila va xotin-qizlar bo‘limi boshliqlari hamda tijorat banklari vakillari bilan muloqot o‘tkazdi.
Unda xotin-qizlar bandligini taʼminlash bo‘yicha Toshkent viloyati Yangiyo‘l tumanidagi “Qirsadaq” mahallasi namunasi asosida ishlab chiqilgan yangi tizimni Qashqadaryo viloyatida yo‘lga qo‘yish borasida amalga oshirilgan ishlar tanqidiy muhokama qilindi.
Bunda ishsiz, ishlash istagidagi xotin-qizlarni ularning imkoniyat va ehtiyojlarini aniqlash ishlari sust olib borilayotgani qayd etilib, ularni bartaraf etish yuzasidan vazifalar belgilab berildi. Xususan, xonadonbay o‘rganish ishlariga tijorat banklarini va mutasaddi tashkilot vakillarini jalb etish lozimligi taʼkidlandi.
O‘rganish natijalaridan kelib chiqqan holda ishsiz va daromad topishga qaratilgan muayyan mehnat faoliyati bilan shug‘ullanish istagidagi xotin-qizlarni mavjud bo‘sh hamda yangi yaratilgan ish o‘rinlariga ishga joylashtirish, jamoat ishlariga jalb qilish orqali bandligini taʼminlash bo‘yicha tegishli ko‘rsatmalar berildi.
Mahallalarda tadbirkorlik faoliyatini yo‘lga qo‘yish, hunarmandchilik, kasanachilik va tomorqachilik faoliyati bilan shug‘ullanishni maqsad qilgan xotin-qizlarga o‘z vaqtida subsidiyalar ajratish zarurligi aytib o‘tildi.
Bundan tashqari, o‘rganishlar davomida aniqlangan tibbiy, psixologik, ijtimoiy yordamga muhtoj xotin-qizlarga manzilli yordam ko‘rsatish, ijtimoiy yordamga muhtoj ayolning muammosi to‘liq hal etilgunga qadar uning nazoratini yo‘lga qo‘ish va zarur holda qo‘shimcha yordam ko‘rsatilishini taʼminlash lozimligi alohida qayd etildi.
Izoh (0)