AQSHning Nyu-York shtatidagi Kolumbiya universitetida Falastinni qo‘llab namoyish uyushtirgan 100 dan ortiq talaba hibsga olindi. Bu haqda Middle East Press nashri xabar berdi.
Manbada aytilishicha, voqea 18-aprel kuni ro‘y bergan. Namoyishga chiqqan talabalar ommaviy hibsga olingan. Bu esa oliygoh kampusi hududida yangi keskinlikni keltirib chiqargan.
Universitet talabalari AQSHni Isroilga harbiy yordamni to‘xtatishga chaqirgan norozilik aksiyasi tashkil etgan. Falastinni BMTga qabul qilishga chaqiriqlar yangragan. Talabalarni hibsga olishga universitet prezidenti Minuch Shafik shaxsan boshchilik qilgani aytilgan.
Talabalar dastlab 17-aprel kuni universitet kampusida o‘nlab ko‘chma chodirlar qurishgan. Ular o‘zlarini Kolumbiya universiteti aparteid tizimiga qarshi kurashuvchilar deb atashgan. Chodirlar o‘rnatilgan kampus hovlisini esa “G‘azo birdamlik lageri” deb nomlashgan.
Universitet rektori so‘zlariga ko‘ra, namoyishchilarga universitet tartib-qoidalarini buzayotganliklari va buni to‘xtatishlari zarurligi bir necha bor aytilgan. Namoyishda qatnashayotgan barcha universitet talabalari o‘qishdan chetlashtirilgani haqida maʼlum qilingan. Ammo bu qadam ham talabalarni to‘xtata olmagan.
Columbia Daily Spectator manbasi xabariga ko‘ra, jami 108 nafar talaba hibsga olingan. Ulardan ikki nafari qo‘shimcha ravishda namoyishni tashkillashtirganlikda va hukumat siyosatiga to‘sqinlik qilganlikda ayblanmoqda.
“Ular Sofoklni, Karl Marksni, Martin Lyuter Kingni o‘qib-o‘rganadilar, ammo genotsidga qarshi turish vaqti kelganida, o‘qiganlariga amal qilmaydilar — hech narsa qilmaydilar”, — deyilgan norozilik ko‘targan talabalar bayonotlarida.
BMT universitet va okrug maʼmuriyatining talabalarga nisbatan tutgan siyosatini qoralab chiqqan. Talabalar bilan bog‘liq siyosatdan ehtiyotkor bo‘lishga chaqirgan.
Izoh (0)