Yaponiya tashqi ishlar vaziri Yoko Kamikava 14-aprel kuni e’lon qilgan bayonotida Eronning Isroilga qarshi javob hujumini qoralab, buni keskinlashuv deb atadi hamda vaziyatdan chuqur xavotirda ekanini aytdi. Bu haqda Reuters xabar berdi.
Bu hujum Yaqin Sharqdagi hozirgi vaziyatni yanada yomonlashtiradi. Biz chuqur xavotirdamiz va bunday keskinlashuvni qoralaymiz, — deyiladi bayonotda.
Bayonotda, shuningdek, tinchlik va barqarorlik Yaponiya uchun ayniqsa muhim ekani va hukumat vaziyatning yomonlashuviga yo‘l qo‘ymaslik uchun zarur diplomatik choralarni ko‘rishda davom etishi ta’kidlangan.
Eron 13-aprel kuni kechqurun Isroil hududiga birinchi to‘g‘ridan to‘g‘ri hujumida portlovchi dronlarni va raketalarni uchirdi. Mamlakat ushbu hujumni Eronning Suriyadagi elchixonasiga hujum uchun javob deya izohlagan.
Ma’lumot uchun, Yaponiya neft importida asosan Yaqin Sharqqa tayanadi, xom neftning 95 foizi mintaqadan keladi.
Yaponiya ham an’anaviy ravishda Eron bilan do‘stona davlat bo‘lib kelgan, bosh vazir Fumio Kisida sentyabr oyida Eron prezidenti Ibrohim Raisi bilan uchrashib, Eron yadro dasturini muhokama qilgan edi.
Izoh (0)