O‘zbekiston delegatsiyasi Germaniyaga tashrif doirasida taʼlim bo‘yicha qator kelishuvlarga erishmoqda. Bu haqda Maktabgacha va maktab taʼlimi vazirligi matbuot xizmati “Daryo”ga maʼlum qildi.
Ayni paytda Maktabgacha va maktab taʼlimi vaziri Hilola Umarova boshchiligidagi delegatsiya aʼzolari Germaniyada bo‘lib turibdi. Tashrif doirasida vazirlik huzuridagi “Yangi O‘zbekiston” universiteti va Ingolshtadt amaliy fanlar universiteti o‘rtasida anglashinuv memorandumi imzolandi. Kelishuvga ko‘ra, endilikda o‘zbek talabalari Ingolshtadtning yaqin hamkori hisoblanuvchi Audi va BMW kabi korxonalarida amaliyot o‘tashlari mumkin bo‘ladi.
Shu bilan birga, Mitvayda amaliy fanlar universiteti bilan ikki diplomli magistratura dasturini tashkil etish to‘g‘risidagi anglashinuv memorandumi imzolandi. Hujjatga asosan, Sanoat boshqaruvi – innovatsiya va biznesni rivojlantirish dasturida o‘zbekistonlik talabalar ikkinchi semestrni Germaniyada davom ettiradi.
Tashrif davomida Maktabgacha va maktab taʼlimi vazirlik masʼullari Myunxen texnika universiteti professor–o‘qituvchilari bilan almashinuv dasturini kengaytirish bo‘yicha muzokara olib bormoqda.
Germaniyada o‘zbekistonlik mehmonlar ishtirokida qator tadbirlar o‘tkazilmoqda. Uchrashuvlarda talabalarni sanoat sohasida tayyor kadr bo‘lib yetishishi uchun O‘zbekistonda turli laboratoriyalar ochish, Siemens kompaniyasi tomonidan laboratoriya o‘quv mashg‘ulotlarini o‘tkazadigan alohida trenajyor markazlari tashkil etish singari kelishuvlarga erishilgan.
Qo‘shimcha qilinishicha, Germaniyada tashkil etilgan simpoziumda Energetika vazirligi, “O‘zavtosanoat” AJ, Uzbekistan Airways AJ, “Olmaliq KMK” AJ, “Navoiy KMK” va boshqa korxonalar vakillari ham ishtirok etgan. Simpozium davomida O‘zbekistonda taʼlim, ilm-fan va sanoat o‘rtasidagi hamkorlik bo‘yicha amalga oshirilgan ishlar va kelajakda Germaniyaning ilg‘or tajribasi asosida yaxlit tizim yaratish bo‘yicha rejalar haqida suhbatlashilgan.
Izoh (0)