Qozog‘iston Senati (parlament yuqori palatasi) ayollar huquqlari va bolalar xavfsizligini himoya qilishni kuchaytirishga qaratilgan qonunni ikki o‘qishda ma’qulladi. Majilis (quyi palata) fevral oyida ushbu qonunni qabul qilgan va endi uni prezident Qosim-Jo‘mart To‘qayev imzolashi kerak.
Qonun urish va qasddan badanga yengil shikast yetkazganlik uchun jinoiy javobgarlikni nazarda tutadi, shuningdek, sog‘liqqa qasddan o‘rtacha va og‘ir shikast yetkazganlik uchun jazoni kuchaytiradi. Bundan tashqari, voyaga yetmaganlarga nisbatan jismoniy zo‘ravonlik va shafqatsiz munosabatda bo‘lish bilan bog‘liq jinoyatlarda tomonlarning yarashuvi ehtimoli istisno qilingan.
Tuzatishlar voyaga yetmaganlarni o‘ldirish, zo‘rlash yoki jinsiy tajovuz uchun faqat umrbod qamoq jazosini nazarda tutadi, 16 yoshga to‘lmagan shaxslarni “jinsiy aloqaga chorlash” uchun jinoiy javobgarlikni o‘z ichiga oladi. O‘z joniga qasd qilishga olib borish va bunga undaganlik uchun ozodlikdan mahrum qilish, suitsidni targ‘ib qilganlik uchun esa jarimalar nazarda tutilgan.
Qozog‘istonda oiladagi zo‘ravonlik uchun jinoiy javobgarlikka tortish qonuni sobiq milliy iqtisodiyot vaziri Kuandik Bishimbayev rafiqasi Saltanat Nukenovani shafqatsizlarcha qiynoqqa solib o‘ldirganlikda ayblanayotgani yuzasidan o‘tkazilayotgan sud jarayoni fonida ma’qullandi.
Tergov maʼlumotlariga ko‘ra, 2023-yil 9-noyabrga o‘tar kechasi Bishimbayev o‘z xotinini restoranda shafqatsizlarcha kaltaklagan, ayol olgan jarohatlari tufayli vafot etgan. Bishimbayev ertasi kuni hibsga olingan. U rafiqasi o‘limida ishtirokini rad etib, Saltanat spirtli ichimlik iste’mol qilganidan keyin tajovuzkorlik ko‘rsatib, uni janjal qilishga undaganini aytgan.
11-aprel kuni tegishli ish bo‘yicha sud majlisi bo‘lib o‘tdi, unda sobiq vazirning qarindoshi Baxitjan Bayjanov Bishimbayevning xotinini ko‘kargan holda bir necha bor ko‘rganini tan oldi. Bayjanov jinoyatni yashirish va jinoyat haqida xabar bermaslikda ayblangan. Uning ko‘rsatmasi bilan Bishimbayev xotinini urgani aks etgan kuzatuv kameralaridagi yozuvlarning bir qismi o‘chirilgan.
Izoh (0)