MSCHF kreativ kompaniyasi AirPods bilan bir xil ko‘rinishga ega shirinliklarni ishlab chiqardi. Bu haqda Europaplus nashri xabar berdi. Kompaniya saytida yozilishicha, 50 dollarlik mazkur shirin naushniklar to‘plamining birinchi partiyasi qisqa fursatda sotildi.
Yangi naushniklar ko‘rinishdan haqiqiy Apple gadjetidek, u faqat qutidagi mashhur tishlangan olma logotipi bilan farq qiladi. Shirin AirPods’da mashhur olma ikki yondan tishlab olingan.
“Mazkur bir juft AirPods quloqchinlari o‘zining ergonomik shakli bilan ajralib turadi, ta’mi esa sizga yalpiz kabi xushbo‘ylik baxsh etadi, — deya kompaniya o‘z mahsulotini taqdim etdi.
Shirinlik diabetga chalinganlar uchun shakar o‘rnini bosuvchi mahsulot — izomalitdan tayyorlangan. Bir dona quloqchin konfetning ozuqaviy qiymati 10 kilokaloriya. Ishlab chiqaruvchilar mahsulot tarkibida GMO, sun’iy yog‘lar va allergenlar yo‘qligiga kafolat beradi.
Ma’lumot uchun: MSCHF kompaniyasi o‘zining bahsli nashrlar va janjalli marketing strategiyasi tufayli qisqa vaqtda AQSHda mashhurlikka erishgan. Kompaniya 2016-yil Gabriel Ueyli tomonidan tashkil etilgan. MSCHF so‘zining o‘zi “mischief” dan olingan bo‘lib, qora hazil, sho‘xlik, prank degan ma’noni anglatadi.
Izoh (0)