Rossiyada “maxsus harbiy operatsiya” ishtirokchilariga 1 gektargacha bo‘lgan yerlarni bepul tarqatish taklif etildi. Qonun loyihasi Davlat dumasiga Sergey Mironov boshchiligidagi “Adolatli Rossiya – Haqiqat uchun” fraksiyasi tomonidan taqdim etilgan. Bu haqda “Izvestiya” xabar berdi.
Tegishli taklif Ukraina, o‘zini o‘zi mustaqil deb e’lon qilgan Donetsk va Lugansk xalq respublikalari hududlarida 2022-yil 24-fevraldan buyon jangovar amaliyotlarda qatnashgan “faxriylar” orasidan Rossiya fuqarolariga yer ajratishni nazarda tutadi.
“Federal qonun loyihasiga muvofiq, Rossiya fuqarolarga davlat yoki munitsipal mulkda bo‘lgan maydoni 1 gektardan oshmaydigan yer uchastkasidan bepul foydalanishni ta’minlash taklif etiladi”, — deyiladi xabarda.
Ta’kidlanishicha, bunday yer har qanday subyektda bir marta berilishi mumkin, biroq Qrim, federal ahamiyatga ega shaharlar: Moskva, Sankt-Peterburg, Sevastopol; Moskva viloyati, Kaliningrad viloyati, shuningdek, Janubiy federal okrugi, Shimoliy Kavkaz federal okrugidagi yer uchastkalari bundan mustasno.
“Albatta, bu likvid yerlar bo‘lishi kerak. Odamlar kredit olib, o‘z mablag‘i bilan yerni o‘zlashtirishi uchun bir gektar yerni ularning boshiga tashlab bo‘lmaydi. Bu uchastkalar yakka tartibdagi uy-joy qurilishi uchun yaroqli bo‘lishi kerak, demak, viloyat va munitsipial hokimiyatlar buning uchun barcha zarur shart-sharoitlarni yaratishi talab qilinadi”, — dedi Sergey Mironov “Izvestiya” bilan suhbatda.
Izoh (0)