O‘n besh daqiqada quriladigan zamonaviy yig‘ma uy sotuvga chiqarildi (foto)

Officer Owl kompaniyasi Tiny Home Kit nomli zamonaviy yig‘ma uyni taqdim etdi. Mobil uyning hajmi 36 metr kvadrat bo‘lib, uni yig‘ish uchun uzog‘i 15 daqiqa vaqt ketadi.

Mini uy Amazon internet savdo platformasiga sotuvga qo‘yilgan. Ishlab chiqaruvchining so‘zlariga ko‘ra, Tiny Home Kit vaqtinchalik turar joy uchun ajoyib yechim bo‘la oladi.

Mitti uyni qurish uchun hech qanday bolt va gayka kabi quruvchilik asboblari shart emas. Shunchaki gidravlik shiftlarni ko‘tarishingiz, tayyor mexanizmli devor va pollarni o‘rnatishingiz kifoya. Xonadonda 2 ta yotoqxona, oshxona va yuvinish xonasi mavjud.

Mazkur uy uzoq vaqt xizmat qilish uchun mo‘ljallanmagan deb o‘ylasangiz, adashasiz. Mini uyda quyosh nuri va havo aylanishini ta’minlash uchun strategik jihatdan oqilona joylashtirilgan derazalar mavjud. Devorlar yong‘inga chidamli, suv o‘tkazmaydi va issiqlik izolyatsiyasiga ega. Uy hatto sakkiz darajali zilzilaga bardosh bera oladi.

Officer Owl kompaniyasi ta’kidlashicha, uy 25 yil davomida xonadon egalariga xizmat qila oladi. Uning narxi esa Amazon’da 13,500 dollardan boshlanadi.