Yaqin Sharqda kechayotgan qonli urush harakatlari boshqa hududlarga ham yoyilishni boshladi. Kecha, 1-aprel kuni tunda Isroil harbiy-havo kuchlari Suriya poytaxti Damashq shahrida joylashgan Eron elchixonasi va konsulligiga raketa zarbasini amalga oshirdi.
Maʼlumotlarga ko‘ra, hujum natijasida 7 ta eronlik harbiy, 3 nafar Suriya fuqarosi va 1 nafar livanlik halok bo‘lgan. Reuters agentligining yozishicha, Islom Inqilobi Qo‘riqchilari Korpusi generali Muhammad Zohidiy Isroilning Eron konsulligiga uyushtirgan hujumi natijasida halok bo‘lgan. Xo‘sh, nega Isroil xalqaro huquq normalarini buzgan holda Suriya hududidagi Eron elchixonasini bombardimon qildi? Hujumdan ko‘zlangan maqsad Eronni urushga tortishmi? "Daryo" ushbu savollar bilan Farhod Karimovga yuzlandi.
Siyosatshunos Farhod Karimovning taʼkidlashicha, hujumdan ko‘zlangan asosiy maqsad — Islom Inqilobi Qo‘riqchilari Korpusi generali Muhammad Zohidiyni yo‘q qilish bo‘lgan.
“Hujumning asosiy maqsadi — Islom Inqilobi Qo‘riqchilari Korpusi generali Muhammad Zohidiyni yo‘q qilish bo‘lgan. Chunki, Muhammad Zohidiy Eronni butun mintaqa bilan, xususan, “Hizbulloh” bilan munosabatlarini bog‘lovchi muhim shaxs hisoblangan. Bu orqali Isroil mintaqada “Hizbulloh” va Eronning taʼsirini kamaytirmoqchi. Hozir Isroil bu hujum borasida hech qanday fikr bildirmayapti. Lekin boshqa davlat hududidagi uchinchi mamlakatning diplomatik korpus vakillarini yo‘q qilinishi har qanday xalqaro huquq-normalariga zid. Buning oqibati o‘ta ayanchli bo‘lishi mumkin. Eron ham javob qaytarsa kerak. Sababi Isroil mutlaqo urush qoidalarini buzgan holda harakat qilmoqda. Bugun biz Isroilni barcha xalqaro huquq-normalarini umuman tan olmagan holda chegaradan chiqayotganiga guvoh bo‘lmoqdamiz. Bu Isroilni ortida turgan kuchlarning qo‘llovi bilan amalga oshmoqda”, — deydi siyosatshunos.
Isroil tomonidan Suriyadagi Eron konsulligiga qilingan hujum ortidan Eronning BMTdagi elchisi Xavfsizlik Kengashidan “bu jinoiy harakatni imkon qadar keskin qoralashni va xalqaro huquq normalari va tamoyillarini ochiqdan-ochiq buzayotganini ko‘rib chiqish uchun zudlik bilan yig‘ilish o‘tkazishni so‘radi”. Shuningdek, maktubda “Eron ushbu terrorchilik hujumiga qatʼiy javob berish uchun qonuniy va ajralmas huquqni o‘zida saqlab qolishi” qayd etilgan.
“Eron BMTga murojaat qilish orqali, o‘zi beradigan javob zarbalarini xalqaro nuqtai nazardan qonuniylashtirib olmoqda. Demak, Eron tomonidan Isroilga javob bo‘ladi. Chunki mamlakat vakolat xonasiga hujum qilish, hech qaysi urush qonun-qoidalariga to‘g‘ri kelmaydi. Lekin bu konflikt mintaqada katta urushga olib kelmaydi”, — dedi siyosatshunos Farhod Karimov.
Hozircha Isroil hukumati Eron elchixonasiga amalga oshirilgan hujum borasida rasmiy munosabat bildirganicha yo‘q.
Izoh (0)