AQSH transport vazirligi Baltimorda kema qulashi oqibatida zarar ko‘rgan ko‘prikni dastlabki tiklash ishlari uchun 60 million dollar ajratdi. Tegishli maʼlumotlar vazirlikning 28-mart kuni eʼlon qilingan press-relizida keltirilgan.
Xabarda aytilishicha, mablag‘lar Merilend shtatidagi birlamchi favqulodda vaziyatlarda ko‘prikni taʼmirlash, loyihalash va rekonstruksiya qilish xarajatlariga yo‘naltiriladi. Transport vaziri Pit Buttijichga ko‘ra, pul favqulodda federal jamg‘armalar hisobidan ajratiladi.
Prezident Bayden federal hukumat ko‘prikni qayta qurish va Baltimor portini qayta ochish uchun qo‘lidan kelgan barcha ishni qilishini aytdi, — dedi transport vaziri.
AQSH prezidenti Jo Bayden Baltimor ko‘prigining qulashi kema va uning tayanchining tasodifiy to‘qnashuvi natijasi ekanini aytgan. Uning taʼkidlashicha, bu qasddan amalga oshirilmagan.
AQSH transport vaziri Pit Buttijich ko‘prik qulashi oqibatida olti kishi halok bo‘lganini tasdiqlagan.
- 26-mart kuni mahalliy vaqt bilan 01:27 da Baltimorda (Merilend, AQSH) yuk kemasi ko‘prik tayanchiga urilishi natijasida uzunligi 2,57 km bo‘lgan Frensis Skott Key avtomagistral ko‘prigi suvga qulab tushgan edi.
- Ko‘prik tayanchiga borib urilgan Singapur bayrog‘i ostidagi “Dali” kemasi yonib, cho‘kib ketgan. Inshootning qulashi natijasida o‘nlab avtomobillar daryoga qulagan.
- Ko‘prik 1977-yilda qurilgan va AQSH milliy madhiyasi The Star-Spangled Banner muallifi Frensis Skott Key sharafiga nomlangan edi.
Izoh (0)