Moskva viloyatidagi “Piknik” guruhining konserti bo‘lib o‘tayotgan Crocus City Hall konsert zalida nomaʼlum shaxslar o‘t ochishi oqibatida 80 dan ortiq odam halok bo‘ldi. Ijtimoiy tarmoqlarda terakt uyushtirganlarning barchasi Tojikiston fuqarolari ekani to‘g‘risida xabarlar tarqaldi. Tojikiston Tashqi ishlar vazirligi esa holatga munosabat bildirib, OAV vakillaridan feyk xabarlar tarqatmaslikni so‘radi.
Hurmatli ommaviy axborot vositalari vakillari!
Moskvadagi Crocus City Hall konsert majmuasida sodir bo‘lgan terakt munosabati bilan Tojikiston fuqarolari yoki tojikistonliklarning ushbu harakatga aloqadorligi haqidagi ma’lumotlarni tarqatishga mas’uliyat bilan yondashish zarurligiga e’tibor qaratamiz.
Tojikiston tomoni ayni vaqtda Tojikiston fuqarolarining aloqadorligiga oid tarqalayotgan feyk xabarlar bo‘yicha Rossiya rasmiy hukumatidan tasdiqlov olmaganini ta’kidlaymiz. Shu sababli Rossiya davlat organlarining rasmiy ma’lumotlariga tayanish so‘raladi.
Shuni inobatga olish lozimki, tekshirilmagan va ishonchsiz ma’lumotlarning tarqatilishi mamlakatdan tashqarida bo‘lgan Tojikiston fuqarolariga zarar yetkazishi mumkin.
22-mart kechasi Moskva viloyatidagi “Piknik” guruhining konserti bo‘lib o‘tayotgan Crocus City Hall konsert zalida nomaʼlum shaxslar o‘t ochdi. Binoda portlash sodir bo‘lgan va yong‘in boshlangan. Reuters agentligiga ko‘ra, terakt uchun ISHID mas’uliyatni o‘z zimmasiga olgan.
Izoh (0)