Rossiya Ukrainada foydalanish uchun AQSH va Yevropadagidan uch marta ko‘p artilleriya snaryadlarini ishlab chiqarmoqda — CNN

Rossiya AQSH va Yevropaga qaraganda qariyb uch baravar ko‘p artilleriya o‘q-dorilarini ishlab chiqarmoqda. Bu esa Rossiyaga yil oxirida Ukrainada navbatdagi hujumni tashkil etishga imkon berishi mumkin. Bu haqda CNN nashri xabar berdi.

NATO razvedka xizmatlarining CNN nashriga taqdim etgan maʼlumotlariga ko‘ra, Rossiya oyiga 250 ming yoki yiliga 3 millionga yaqin artilleriya snaryadlari ishlab chiqarmoqda. AQSH va Yevropa Ittifoqining Kiyevga jo‘natish uchun ishlab chiqarayotgan snaryadlari yillik soni esa atigi 1,2 milliontaga yetadi.

Xabarda aytilishicha, AQSH harbiylari 2025-yil oxirigacha oyiga 100 mingta artilleriya snaryadi ishlab chiqarishni o‘z oldiga maqsad qilib qo‘ygan. Bu miqdor Rossiya oylik ishlab chiqarishining yarmidan kamini tashkil qiladi.

Rasmiylarning aytishicha, Rossiya hozirda Ukraina tomon kuniga 10 mingga yaqin snaryad uloqtiradi, Ukraina tomonida esa bu ko‘rsatkich kuniga 2 mingtani tashkil etadi. Frontning ayrim zaif nuqtalarida esa sutka davomida artilleriya snaryadlaridan foydalanilmagan.

Rossiya Ukrainaning Avdeyevka shahrini egallagach, nisbatan intensiv urush olib borayotgani aytilgan. Ukraina tomoni esa hozirda nafaqat o‘q-dorilar yetishmovchiligi, balki frontda ishchi kuchi tanqisligi muammosi bilan ham kurashayotgani xabar qilingan.