“Hududiy elektr tarmoqlari” AJ mutasaddilari, Toshkent hududiy filiali Qibray tuman elektr ta’minoti xodimlari hamda DXX, Bosh prokuratura huzuridagi departamentning tuman bo‘limi vakillari hamkorligida Qibray tumanida o‘tkazilgan navbatdagi reyd tadbirlari o‘tkazildi.
Tadbirlar davomida “Baytqo‘rg‘on” MFY hududidagi xonadonda yashovchi S.M. o‘z uyida 3 dona mayning kriptoaktiv qurilmalarini tijorat maqsadida umumiy foydalanishdagi elektr tarmog‘iga o‘zboshimchalik bilan ulab, jami 579,4 million so‘mlik elektr energiyasini o‘g‘irlagani aniqlangan.
Shuningdek, reyd davomida Mirzo Ulug‘bek tumani “Alisherobod” hududidagi xonadonda yashovchi F.R. o‘z uyida 4 dona mayning kriptoaktiv qurilmalarini tijorat maqsadida elektr ta’minoti korxonasi “Elektrhisob” DKdan ro‘yxatdan o‘tkazmasdan elektr tarmog‘iga o‘zboshimchalik bilan ulab, jami 365,2 million so‘mlik elektr energiyasini o‘g‘irlagani ma’lum bo‘ldi.
Mazkur holat yuzasidan huquqbuzarga elektr energiyasidan noqonuniy foydalangani uchun 63,6 million so‘m qayta hisob-kitob qilingan hamda noqonuniy foydalanilgan mayning fermalariga nisbatan 5 barobar o‘suvchi koeffitsiyent qo‘llanib, 944,6 million so‘m mablag‘ undirishga hujjatlar rasmiylashtirilgan.
Mazkur holatlar yuzasidan dalolatnomalar rasmiylashtirib, to‘plangan hujjatlar huquqni muhofaza qiluvchi organlarga taqdim etilgan.
Avvalroq poytaxtda elektr energiyasiga noqonuniy tarzda ulanib, 1,5 milliard so‘mlik zarar yetkazgan mayning ferma aniqlangani to‘g‘risida xabar berilgandi. Shuningdek, Jizzaxda ikkita mayning ferma davlatga salkam yarim milliard so‘m zarar yetkazgani ma’lum bo‘lgan edi.
Izoh (0)