Namangan viloyatida ichimlik va oqova suv xizmatlari narxi qayta ko‘rib chiqildi. Bu haqda 21-fevral kuni viloyat hokimligi matbuot xizmati xabar berdi.
Qayd etilishicha, 2024-yil 30-yanvar kuni viloyat hokimi “Namangan suv ta’minoti” AJda bo‘lib, aholini toza ichimlik suvi bilan ta’minlash masalasida olib borilayotgan ishlar, bu borada ustuvor vazifalar ijrosini muhokama qilgan. O‘shanda soha mutaxassislari viloyat rahbariga aholi uchun 1 metr kub ichimlik suvga 4000 so‘m narx belgilashni taklif etgandi.
Shavkatjon Abdurazzoqov bu summani kamaytirish uchun topshiriq berib, uning manbalarini ham ko‘rsatib o‘tdi. Jumladan, eng avvalo, tizimdagi “rejalashtirilgan yo‘qotish” ko‘rsatkichlarini kamaytirish lozimligini uqtirdi.
Shundan kelib chiqib, “Namangan suv ta’minoti” AJ tomonidan ichimlik va oqova suv ta’riflari qayta ko‘rib chiqilib, tegishli xulosaga ko‘ra:
aholiga 1 metr kub:
- ichimlik suv uchun — 3500 so‘m;
- kanalizatsiya xizmati uchun — 800 so‘m;
byudjet va boshqa tashkilotlarga:
- ichimlik suvi — 7000 so‘m;
- kanalizatsiya xizmati — 975 so‘m deb belgilash taklif etildi.
Deputatlar bu masala yuzasidan fikr-mulohazalarini bildirib, yangi ta’riflarni tasdiqladi.
Ma’lumot uchun, Namangan viloyatida ichimlik suvi uchun aholi 2550 so‘m, korxona-tashkilotlar esa 3315 so‘m to‘lab kelayotgandi. Bu narxlar 2020-yil dekabrida belgilangan va shundan beri o‘zgarmagan.
Izoh (0)