Fransiya sudi Lazur sohilidagi Rokbyurn-Kap-Marteneda joylashgan “Gazprom”ning 120 million yevrolik villasini hibsga oldi. Bu haqda Le Monde xabar berdi.
Qaror pul yuvish bilan bog‘liq tergov doirasida qabul qilingan. Rasmiy ravishda villa “Tashir” kompaniyalar guruhi asoschisi rossiyalik milliarder Samvel Karapetyanga tegishli, biroq Parij prokuraturasi uning haqiqiy benefitsiarini “Gazprom” sho‘ba korxonasi deb biladi. Fransuz ommaviy axborot vositalarining xabar berishicha, 2010-yillarning boshidan Alina Kabayeva u yerda doimiy yashay boshlagan. U dunyodagi eng qimmat villalardan biri hisoblanadi.
Ilgari Villa del Mare nomi bilan tanilgan mulk 120 million yevroga baholangan. Uch gektar maydonda asosiy ko‘p qavatli binodan tashqari, u uchta basseyn, tennis korti va vertolyot maydonchasini o‘z ichiga oladi. Villaga egalik huquqini va SNC Maritime Villa Holding’ga egalik qiluvchi kompaniya aksiyalarini muzlatish to‘g‘risidagi qaror 12-fevral kuni qabul qilingan. Bu Ukrainada urush boshlanganidan beri Rossiyaga tegishli ko‘chmas mulkining eng muhim musodarasiga aylandi.
Parij uyushgan jinoyatchilik bo‘limi 2009-yil 11-dekabrdan beri Parij, Kipr, Rossiya va Rokbyurn-Kap-Marten shaharlarida sodir etilgan pul yuvish holatlarini tergov qilmoqda.
“Gazprom neft” villani 2016-yilda Karapetyanga sotgan. Biroq tergov davomida ko‘plab faktlar, jumladan, tegishli mulk Rossiyadagi eng yirik energiya kompaniyasining nazoratini hech qachon tark etmagani aniqlangan.
Shunday qilib, xarid “Gazprombank”ning (Rossiya prezidenti Vladimir Putinning do‘sti Yuriy Kovalchuk va “Gazprom”ga tegishli) 115 million yevro miqdoridagi krediti evaziga amalga oshirilgan. Kredit Karapetyanga villani garovga olgan holda berilgan.
Tadbirkor ko‘chmas mulk, qurilish, energetika va moliya sohalarida faoliyat yurituvchi “Tashir” kompaniyalar guruhi rahbari hisoblanadi. Forbes uning boyligini 2,7 milliard dollarga baholamoqda.
Karapetyan muvaffaqiyati ko‘p jihatdan “Gazprom”dan olingan ko‘plab shartnomalar bilan bog‘liq. Guruh konserniga uskunalar yetkazib bergan, binolarni ta’mirlagan, gaz quvurlari qurgan.
Izoh (0)