Bolgariya Mudofaa vazirligi Ukrainaga 100 dona BTR yetkazib berish uchun NATOdan mablag‘ so‘rashiga to‘g‘ri keldi va hozircha bu qurollarni Kiyevga topshirish keyinroqqa qoldirildi, deb yozadi Euractiv.
“Bolgariya yordam berishi mumkin, ammo bu jarayon kerakli tezlikda ketmayapti, umid qilamanki, vaziyat yaxshilanadi. Biz zirhli transport vositalarini yetkazib berishga deyarli uch oy avval ovoz bergan edik, biroq uch oy ichida yuzta BTRni Sofiyadan Rusega olib o‘ta olmadik”, — deya tushuntirdi hukmron koalitsiya o‘rinbosari Ivaylo Mirchev.
U Bolgariya Mudofaa vazirligining ish sharoitlari optimal emasligidan shikoyat qildi.
18-fevral kuni mudofaa vaziri Todor Tagarev BTRlarni jo‘natish kechikishiga ushbu harbiy texnikani tashish bilan bog‘liq muammo sabab bo‘lganini aytdi. Vazir “bu oddiy transport emas, uni tashish juda ko‘p yuk poyezdlarini talab qiladi”, deb ta’kidladi.
8-avgust kuni Sofiyada va 13-noyabrda Kiyevda vazirlar darajasida Ukrainaga Bolgariya zirhli texnikalarini tekin yetkazib berish bo‘yicha kelishuv imzolangan edi. Ammo yanvar oyi o‘rtalarida Bolgariya Milliy radiosi Bolgariya Ukrainaga va’da qilingan bronetransportyorlarni yetkazib bera olmagani haqida xabar berdi, chunki yetkazib berish xarajatlari NATOga aʼzo davlatlar tomonidan qoplanishi rejalashtirilgan.
Euractiv eslatishicha, avvalroq Bolgariya Ukrainaga SSSR davridagi qurollar — zirhli transportyorlar, S-300 zenit-raketa komplekslari qismlari, eski S-300 raketalari, snaryadlar va minomyotlar yetkazib berishga va’da bergan.
Izoh (0)