Toshkent viloyatida bitta issiqxona tabiiy gazdan noqonuniy foydalanib, tizimga 605 million so‘mdan ziyod zarar yetkazgani aniqlandi, deb xabar beradi Energetika vazirligi matbuot xizmati.
Qayd etilishicha, “O‘zenergoinspeksiya” tomonidan Bosh prokuratura va huquqni muhofaza qiluvchi boshqa organlar, shuningdek, “Hududgaztaʼminot” AJ xodimlari bilan hamkorlikda Toshkent viloyatida o‘tkazilgan navbatdagi nazorat tadbirida Qibray tumanida joylashgan “M.O.A.P.” MCHJga qarashli issiqxona xo‘jaligi gaz taʼminoti korxonasi bilan shartnoma tuzmasdan tabiiy gazdan noqonuniy ravishda foydalanib kelgani bois tarmoqdan ajratilgani aniqlangan.
Biroq shunga qaramasdan, issiqxona xo‘jaligi egalari gaz quvurining kirish qismidagi zulfinlarga o‘rnatilgan tamg‘alarni o‘zboshimchalik bilan uzgan holda, tarmoqqa qayta ulanib, 7 dona isitish qozoni orqali tabiiy gazdan o‘g‘rincha foydalanib kelayotgani ma’lum bo‘lgan.
Dastlabki hisob-kitoblarga ko‘ra, davlat manfaatlariga yetkazilgan zarar miqdori 605,3 million so‘m (403,5 ming kubometr tabiiy gaz)ni tashkil etgan.
Qoidabuzar isteʼmolchiga nisbatan belgilangan tartibda chora ko‘rish uchun tegishli hujjatlar rasmiylashtirilib, huquqni muhofaza qiluvchi organlarga taqdim etilgan.
Avvalroq Buxoro, Samarqand va Navoiyda salkam 1 mlrd so‘mlik gazdan noqonuniy foydalanish holatlari fosh etilgani, shuningdek, O‘zbekistonning ikki hududida gazdan noqonuniy foydalanganlar 550 mln so‘mdan ziyod zarar yetkazgani to‘g‘risida xabar berilgandi.
Izoh (0)