Farg‘onada daraxtlar kesilishi ortidan kelib chiqqan o‘zaro janjal oqibatida bir ayol vafot etdi. Bu haqda viloyat IIB matbuot xizmati xabar berdi.
14-fevral kuni fuqaro SH.O.(ayol) Farg‘ona shahar “Jo‘ydam” MFYda joylashgan ekin yer maydoni chetidagi terak daraxtlarni kestirayotgan vaqtida ushbu yer maydonining sobiq egasi fuqaro E.U. terak daraxtlari unga tegishli ekanligi bo‘yicha janjallashib ketgan.
Janjal davomida E.U. ayolning bosh qismiga tosh bilan urib, tan jarohati yetkazgan. Ko‘rsatilgan birinchi tez-tibbiy yordamga qaramasdan, u shifoxonada vafot etgan.
Tayinlangan sudga oid tibbiy ekspertizaning dastlabki xulosasiga ko‘ra, SH.O.ning o‘limiga bosh qismidan olgan og‘ir tan jarohatlari sabab bo‘lgani ko‘rsatilgan.
Mazkur holat yuzasidan E.U.ga nisbatan Farg‘ona shahar prokuraturasi tomonidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, qamoqqa olingan. Hozirda tergov harakatlari olib borilmoqda.
Izoh (0)