O‘zbekiston elchisi Abat Fayzullayev Italiyaning yirik elektr tarmoqlari operatori — Enel kompaniyasi vakillari bilan muzokara o‘tkazdi, deb xabar bermoqda “Dunyo” AA.
Qayd etilishicha, Enel mutaxassislariga O‘zbekistonning so‘nggi yillardagi “yashil” energetikaga o‘tish, quyosh va shamol elektr stansiyalarini qurish borasidagi yutuqlari hamda mamlakat oldida turgan elektr taqsimlash infratuzilmasini modernizatsiya qilish vazifalari yuzasidan batafsil maʼlumot berildi.
Italiya tomoni, xususan Enel’ning ixtisoslashgan Gridspertise sho‘ba korxonasi rahbari Robert Denda ushbu jarayonlarda raqamlashtirish uskunalarini o‘rnatish va tegishli boshqaruv texnologiyalarini qo‘llash juda katta ahamiyat kasb etishini taʼkidlab o‘tdi.
Bo‘lib o‘tgan muzokaralar natijasida Italiya kompaniyalarining O‘zbekistondagi energetika loyihalarida faol qatnashishi uchun amaliy chora-tadbirlar ko‘rishga kelishib olindi.
1962-yilda tashkil etilgan Enel kompaniyasi dunyodagi elektr energiyasi va gazni taqsimlash tarmoqlarida boshqaruvchi hamda xizmat ko‘rsatuvchi eng yirik kompaniyalar o‘ntaligiga kiradi. U dunyoning 30 ta mamlakatida faoliyat yuritadi. Korxonaning yillik aylanmasi 8,6 milliard yevroga teng. Bugungi kunda kompaniya o‘zining 59 GVt quvvatli qayta tiklanadigan energiya ishlab chiqarish inshootlari bo‘yicha dunyoda birinchi o‘rinni egallaydi.
Izoh (0)