O‘zbekistonda 2025-yildan pilla narxini davlat belgilashi amaliyotidan voz kechiladi. Bu haqda Shavkat Mirziyoyev raisligida agrar sohadagi ustuvor vazifa va rejalarga bag‘ishlangan yig‘ilishda ma’lum qilindi.
Yig‘ilishda prezident ipakchilikni rivojlantirishga alohida e’tibor qaratib, tarmoqda keskin o‘zgarish qilish zarurligini ta’kidladi. Vyetnam va Xitoy tajribasi asosida pillani sanoat usulida yetishtirish yo‘lga qo‘yiladi, pilla yetishtiruvchilarning moddiy manfaatdorligi oshiriladi.
Buning uchun ikki bosqichda bozor tamoyillariga o‘tiladi.
- Birinchi bosqichda 2024-yilda pilla narxi 25 foizga oshiriladi. Aholiga pilla yetishtirish uchun subsidiya beriladi va pilla yetishtiruvchilar daromad solig‘idan ozod qilinadi.
- Ikkinchi bosqichda esa 2025-yildan narxni davlat belgilashi, klasterlarga tumanlarni biriktirish, fermer va kasanachilar o‘zi yetishtirgan pillani faqat klasterlarga sotishi amaliyotidan voz kechiladi.
Ya’ni, pilla fermer va klaster o‘rtasida erkin narxda tuziladigan shartnoma asosida yoki birja orqali sotiladi.
Pillachilik sohasini rivojlantirish bo‘yicha mutasaddilarga qator topshiriqlar berildi. Jumladan, ipak qurtini xonadonlarga tarqatib, o‘rma tutzor tashkil etish va uy sharoitida tayyor ipak ishlab chiqarishni rag‘batlantirish bo‘yicha tizim yaratiladi. Ozuqa-yem bazasini ko‘paytirish uchun bu yil dalalar atrofida 150 million yangi navli hosildor tut ko‘chatini ekish topshirildi.
Ipakchilik instituti huzurida ikkita naslli urug‘lik stansiyasi ishga tushiriladi. Institutga xitoylik mutaxassislar taklif qilinib, naslli ipak qurti zotlarini yaratish boshlanadi.
Izoh (0)