Samarqand viloyatida uch kunda ayrim isteʼmolchilarning energiya resurslaridan noqonuniy foydalanishlari natijasida tizimga 5 milliard so‘mlik zarar yetkazilgani aniqlandi. Bu haqda Energetika vazirligi xabar berdi.
7—9-fevral kunlari Energetika vazirligi huzuridagi “O‘zenergoinspeksiya” tomonidan Bosh prokuratura, IIV, hamda elektr va gaz taʼminoti korxonalari xodimlari bilan hamkorlikda Samarqand viloyatida o‘tkazilgan nazorat tadbirlarida energiya resurslaridan noqonuniy foydalanilgan 23 ta holat aniqlangan.
Dastlabki hisob-kitoblarga ko‘ra, tizimga 5 milliard so‘mlik zarar keltirilgan.
Xususan, Paxtachi tumanida “X.Q.S.” MCHJga qarashli issiqxona tabiiy gazdan noqonuniy foydalanishi natijasida 3 milliard 300 million so‘mlik zarar yetkazgan. Urgut tumanida esa “S.N.” MCHJga qarashli ishlab chiqarish sexining transformatori o‘zboshimchalik bilan almashtirilgan bo‘lib, ushbu holat bo‘yicha 700 million so‘m miqdorida qayta-hisob qilingan.
Qoidabuzar isteʼmolchilarga nisbatan belgilangan tartibda chora ko‘rish uchun tegishli hujjatlar rasmiylashtirilib, huquqni muhofaza etuvchi organlarga taqdim qilingan. Ayni paytda hududlarda nazorat tadbirlari davom etmoqda.
Izoh (0)