“Taʼlim sohasidagi islohotlarni jadallashtirish bo‘yicha qo‘shimcha chora-tadbirlar to‘g‘risida”gi prezident qarori imzolandi, deb xabar beradi Norma.
Unga ko‘ra, “Taʼlim sohasidagi loyihalar markazi” loyiha ofisi tashkil etiladi. Loyiha ofisi direktori:
- Prezident administratsiyasi tomonidan lavozimga tayinlanadi;
- Loyiha ofisi direktoriga maktabgacha va maktab taʼlimi vazirining birinchi o‘rinbosari hamda oliy taʼlim, fan va innovatsiyalar vazirining birinchi o‘rinbosari uchun belgilangan vakolatlar beriladi.
2024-yilda Loyiha ofisi quyidagilar bilan shug‘ullanadi:
- pedagog kadrlarni tayyorlash, qayta tayyorlash va ularning malakasini oshirish tizimini tahlil qilish;
- pedagog kadrlar tayyorlaydigan oliy taʼlim tashkilotlarini tizimli rivojlantirish;
- professional taʼlimdan so‘ng oliy taʼlimni davom ettirish imkoniyatlarini yanada kengaytirish, uch yillik taʼlim dasturlari asosida amaliy bakalavriat bo‘yicha kadrlar tayyorlashni yo‘lga qo‘yish;
- taʼlim sohasidagi davlat boshqaruvi organlarining ayrim funksiyalarini (taʼlim tashkilotlari reytingini aniqlash, taʼlim dasturlarini akkreditatsiyadan o‘tkazish va boshqalar) nodavlat, shu jumladan, xalqaro tashkilotlarga autsorsingga berish bo‘yicha takliflar tayyorlash.
Hujjat Qonun hujjatlari maʼlumotlari milliy bazasida eʼlon qilingan va 2024-yil 5-fevraldan kuchga kirdi.
Eslatib o‘tamiz, Shavkat Mirziyoyev raisligida 5-fevral kuni o‘tkazilgan yig‘ilishda professional va oliy ta’limda kasbiy ko‘nikmalarni belgilash va ularni baholash bo‘yicha yangi tizim joriy qilinishi aytilgan edi.
Izoh (0)